而我不知道本土派是誰 - 陳也

起這條題？是咁的。外地親戚問起西九補選種種，睇見有人指，年輕人和本土派不是放棄香港而係放棄泛民，她一頭問號。難得能夠馬後炮，當然樂於幫她們解難鬆綁。但親戚劈頭就問這條題，自以為緊貼時勢的我也只能支吾其辭。嗯，我真係唔知道本土派是誰。阿人和老馮，肯定排除在本土派之外，另外兩位拎到千幾票只能貢獻五萬元保證金給明日大嶼的參選者，有冇自認過本土派？印象中係冇嘅。選舉主任DQ得劉小麗，自認本土派的入閘率相當渺茫。親戚又問，點解本土派放棄泛民，係咪因為阿人和老馮都係OSF（老海鮮）？問題前截關乎雨傘運動前世今生人鬼不分的宿怨，花三年零八個月抗戰式陳述亦未必解釋得明。但兩位候選人確係令人肅然起敬的長者，他們老有所養，打拼人生，下半場絕對可以退休享樂，仍肯入閘陪建制跑（嘿，冇剷我，話明係馬後炮），係有輸得起的容量，絕非呃秤海鮮。自古以來，海鮮有價，坊間有人指老馮個價好堅，我也希望是真的。又不是取代中華白海豚，只係永續魚缸裏的游水海鮮，老馮實證，唔使落孔雀石綠，鹹魚都會翻生。選舉主任毋庸置疑，本土派無論是誰，鹹魚蒸肉餅（或老餅），永遠唔會係選項。