「我由頭唱到落尾!」
作為音樂文盲，冇諗過睇傳奇樂隊Queen嘅傳奇電影《波希米亞狂想曲: 搖滾傳說》(Bohemian Rhapsody)，我會high到郁身郁勢。
除咗樂隊主音Freddie Mercury之外，睇戲之前我連其他成員姓乜名乜都噏唔出。但係啲歌……戲裏面好幾首主打歌前奏一起，我個頭就已經「印吓印吓」，口中唸唸有詞做口型，而且首首都記得歌詞。
呢種反常現象唔止發生喺我一個人身上。
好似鄙人當興趣營運嘅FB影迷群組《百老匯電椅中心》，會員不過區區千幾人，平日大家講嘅都係超級英雄片呀、恐怖片呀咁樣，話題甚少扯到音樂……但近日開post講《波》片，留言居然出奇踴躍: 「最尾個場我都跟住細聲唱」、「我由頭唱到落尾！high爆！」、「臨尾《Live Aid》差啲想企埋起身」、「到完場有成2/3人都坐到開燈先走!」……
有群組會員甚至提議組團二刷，買埋同一場逼爆戲院，大家對住銀幕「卡拉OK」。
回想早前主打ABBA金曲嘅西片《媽媽咪呀！開心再嚟》(Mama Mia) 喺香港上映，有關方面特別增設有字幕嘅「齊齊唱」場次畀樂迷享用，點知反應出奇冷淡，院內幾乎鴉雀無聲。有歌迷更因為大住膽唱出聲，畀身邊盲毛觀眾狂「殊」，無癮非常。
所以，一部音樂電影能夠改變本地「植物人觀影文化」，令觀眾唔理旁人眼光放聲高歌，實在唔簡單。那怕自high影迷依然只屬少數 (相對喺美國勇奪票房冠軍，執筆之時《波》片喺香港只收200零萬，成績講唔止突出)。
「演唱會還原度接近100%」
能夠睇到人熱血沸騰，《波》片導演同演員功不可沒。部戲拍攝過程一波多折，第一手執導嘅Bryan Singer更因為頻頻失場，兼夾喺現場同人「霎氣」，被中途炒魷。但由佢操刀嘅高潮戲 --- 1985年，久休復出嘅Queen 喺超大型慈善演唱會 《Live Aid》再次技驚四座，呢一幕嘅還原度幾乎接近100%! 唔信嘅不妨先睇睇部戲，再睇吓當年現唱會現場片段做個比較: https://youtu.be/A22oy8dFjqc
能夠睇到人熱血沸騰，《波》片導演同演員功不可沒。部戲拍攝過程一波多折，第一手執導嘅Bryan Singer更因為頻頻失場，兼夾喺現場同人「霎氣」，被中途炒魷。但由佢操刀嘅高潮戲 --- 1985年，久休復出嘅Queen 喺超大型慈善演唱會 《Live Aid》再次技驚四座，呢一幕嘅還原度幾乎接近100%! 唔信嘅不妨先睇睇部戲，再睇吓當年現唱會現場片段做個比較: https://youtu.be/A22oy8dFjqc
據飾演低音結他手John Deacon嘅Joseph Mazzello講，為咗將當年短短20分鐘嘅現場演出極致還原，導演直頭要演員逐個beat去排練，動作有咁足跟咁足。飾演主音Mercury嘅Rami Malek甚至有私人「動作指導」，幫佢將舉手頭足有咁似執咁似。
老老實實，若單論外形，Malek真係唔多似Mercury。Malek以「眼大無神」見稱，係佢作為性格演員一大特色。相反Mercury就有啲微絲細眼，而且眉宇間有份媚態；得罪樂迷都要講白啲: 佢神情其實不嬲有啲「咸濕」，而呢點亦係佢魅力所在。
之但係，隨住劇情發展，最嚴格嘅粉絲都不得不承認: Malek愈睇愈似本尊。去到尾場《Live Aid》，Malek直頭好似標童一樣，將Mercury浮誇得嚟高能量嘅舞台風格活現眼前，甚至連背脊都交緊戲 --- 導演刻意模仿當年演唱會片段，包括主音幾個背影shot；睇見Malek後頸同雞翼骨微妙嘅小動作，你不禁覺得眼前見到嘅就係Freddie Mercury。
「最勁嘅音樂係入咗血都唔知」
雖然美國票房成績驕人，但並唔係人人都接受到《波》片。尤其好多資深嘅中外樂迷，對電影簒改歷史、避重就輕嘅處理手法都頗有微言。畢竟當年Mercury以私生活開放，蹤情洩慾見稱，而且對此義無反顧，即使最後死於愛滋絕症，亦無怨無悔。但係電影作為「PG-13」嘅溫和版本，就似乎太著意為如此一個浪人提供大眾接受嘅解釋，彷彿「追尋慾望」本身係唔見得人嘅生活態度。
雖然美國票房成績驕人，但並唔係人人都接受到《波》片。尤其好多資深嘅中外樂迷，對電影簒改歷史、避重就輕嘅處理手法都頗有微言。畢竟當年Mercury以私生活開放，蹤情洩慾見稱，而且對此義無反顧，即使最後死於愛滋絕症，亦無怨無悔。但係電影作為「PG-13」嘅溫和版本，就似乎太著意為如此一個浪人提供大眾接受嘅解釋，彷彿「追尋慾望」本身係唔見得人嘅生活態度。
作為經常將「我覺得原作好睇啲囉」掛喺嘴邊嘅毒L，老樂迷種種不滿我完全理解。之但係部戲成功之處，正正係「飯夫酒卒」如我，都能夠重拾Queens已經「入咗血」嘅魔力。相信好多同代人同我一樣，對隊band嘅依稀印象，仲停留喺80年代Nike用《We Are The Champions》做主題曲；又或者當年睇TVB《周末任你點》， loop到你每個shot都識背嘅《Radio Ga Ga》MV (嗰陣音樂錄象仲係叫「MTV」)。我有群組成員甚至坦言，對Queens最深印象其實喺本地某電訊廣告用咗佢哋隻《We Will Rock You》。
之不過，任何人若然活過喺嗰個年代，只要聽到戲入面嘅歌，睇到製作團隊搏老命呈現Queens嘅音樂魅力，沉睡喺細胞多年嘅魔法一定會被叫醒，令你「fing頭fing髻」，全身標汗。 或者，正因為Freddie Mercury血液入面有HIV，如今我地血液入面先有Freddie Mercury。
撰文：阿雞 《蘋果動新聞》前創作總監，文化雜食者，high嘢cheap嘢都啱，淨係冇中間。現為網台Booom主持cult片節目《百老匯電椅中心》，並負責附屬FB群組百老匯電椅中心:放棄治療部》（broadwayelectricchair）
沒有留言:
發佈留言