有人問我：「『依撈七』點解？」──例如「我依撈七去硬㗎，乜都唔Ｘ理㗎！」／「你依撈七咁老定？」／「依撈七，上就上，冇得講！」……
「依」是否即「二」？「二撈七」我不明，「二打六」就知。
「二打六」常用啦，但凡閑角、茄喱啡、下手、下把、妹仔家丁……統統是「二打六」：二加六即是八，不夠一斤──欠斤両、不入流、坐唔正、唔夠班、資歷有限。民間俗語罵人：「你呢個二打六，有乜資格出聲？」／「佢二打六之嘛，點同我比？」／「睇戲睇大老倌，唔通嘥時間睇二打六咩？」……
粵語中的「打」、「搭」、「孖」、「Na」、「共」、「及」、「夾」，都是「同」的意思，或「加」在一起，那麼「撈」亦一樣。「依」是「二」的轉音，二加七又是什麼狀況？
中國農業社會，嗜賭，農曆年間開賭禁，大人小孩對麻將、天九、牌九、番攤、三公、魚蝦蟹……術語一講就明。天九牌中有簡單玩法叫「合十」，每人取兩隻牌，看加起來點數多少定輸贏。中國傳統中以「九」為最大（天子稱九五之尊），至尊為九，十反而是「盡數」，最小。如果先取地牌兩點，另一當然要「撈」七點，合共九點便勝，所以「三唔識七」、「九唔搭八」，死開！
沒有留言:
發佈留言