風水佬呃你十年八年是常識，但N年前某大師暗批，當灣仔會展隻龜沉下去之時，香港就會玩完。言猶在耳，會展對出因為沙中線沉降，停了一輪工，政府出術將沉降指數大幅調整，即係明明肥佬改到有77分過骨。風水佬有先見之明，預知會展龜出事乃係人禍，災禍源頭，就係對沉降的龜頭視而不見的政府高官。高官也許個個都係楊局長，早就將下一代送出國，香港幾時玩完，長遠而言對高官副局都係不痛不癢的。
所以山竹襲港後打工仔要爬樹跨欄趕返工，為兩餐搏到盡，林鄭卻大講風災後的風涼話，叫勞資雙方互諒互讓，當無良老闆的垂範代言人張宇人透明！市民忍忍忍，百忍成金，但金主林鄭將香港儲備扔落大嶼山填海。會展龜頭終歸沉降，大嶼山又能逃過厄運嗎？千七公頃人工島，頂得住11米高巨浪？沉剩幾多？天意難違，最佳估算，沉剩777公頃，這樣就夾晒林鄭的命格八字！香港人付出天價，上一代、這一代、下一代和下下一代焗住齊齊還人工島的孽債。有人指會展龜其實沉過一次，就係老董推八萬五時，撞正金融風暴。今日林鄭行埋老董，聽佢支笛搞八萬五2.0，又遇着中美貿易戰的海嘯殺埋身。明日之後，唔知家族有幾多囤地和離岸公司戶頭的茂叔說，可以集資嘛。兩個馬主席如有興趣，打個乞嗤就夠一萬億！
沒有留言:
發佈留言