編劇畢業變失業 實景重現電影照緬懷不再星光

 編劇畢業變失業　實景重現電影照緬懷不再星光

雖說黎明來到之前是最黑暗，但看到現今的香港，不少人想回到過去，懷念那個看到李力持、梁家輝仍笑得出的年代。幾個23歲左右剛畢業的大學生，就是希望在港產片尋回好香港，拿着不同電影劇照拍攝實景，記下過去，對比現在。最大不同是甚麼？「而家大家都唔會去睇警匪片啦。」是的，會作嘔的，除非男主角是王喜。

現在是甚麼年代？以蘋果記者名義在IG傳訊息相約訪問時，小朋友們要看記者證、卡片證明的年代，因為怕你是冒充的，怕出來撲小朋友落地告限聚令。先利申，訪問時未有二人限聚令。相約訪問後，他們用一星期研究到哪裏拍照，之後來到中環都爹利街的樓梯，因為這裏拍過很多港產片，如《醉生夢死之灣仔之虎》，不是因為喜歡任達華，而是最愛包辦插曲的Beyond，尤其一首《無盡空虛》。

這個IG專頁「映遊舊戲」在4月開設，把外國一早已經有人做的，套在港產片中。即是拿着電影劇照，到實景中度好位再拍一張現實中有電影、電影中見現實的相片。這幾位大學生其中一位突然變成老人精，「其實電影就係反映現實先好睇，要記錄社會發生緊嘅嘢，如果冇言論自由，即係冇創作自由，電影點會好睇。」因此，大家都在懷念舊片，懷念家駒、梅姐、哥哥，這些我們相信會發聲但已經沒有機會表態的真正港產巨星。

做了這個專頁，有時看電影會變得更留意背景，Coco說：「睇戲見到啲記得喺邊又特別嘅背景，會mark低。」有時不知道的場景，還會問阿爸。劇照哪裏來？「通常都係買碟返嚟，再喺電腦cap圖出嚟，之後再去曬相，會特登曬絨面，因為影相嗰陣唔會反光。」現在年輕人拍照都用iPhone？「唔係呀，之前試過用相機，但因為景深問題，好多時遠景會唔清楚，影呢啲相最緊要背景清楚嘛。之後發現都係iPhone效果最好。」拍照流程就是看電影出提議，再到實景度位影相，之後回家執相，「主要執返啲色，希望同電影近似。」起初會兩個星期出來影一次，「不過因為武漢肺炎，又少出咗。」

阿佳、King、Tom、Coco，幾位剛畢業的同學仔，來自浸會大學電影學院，讀編劇，四位都覺得前路未明，「啱啱畢業未搵到嘢做。」「想試吓自己拍嘢先，同朋友拍吓YouTube片，博一年，橫掂而家境況都咁。」「好難入行啦，都會參加吓啲比賽，寫劇本交上去睇吓攞唔攞到資助。」「學校有冇幫？有啲offer，成班同學，搵一兩個人做，仲唔只今屆，上一屆畢業生都同你爭緊。」

《幻愛》＠禾輋行人隧道：就是《幻愛》劇照的幾條柱，令阿佳自己再去現場補拍。

《黑社會》＠油麻地警署：Tom最愛《黑社會》油麻地警署這一幕，警黑畫面配合得很好。

《忘不了》＠佐敦文匯街：阿King最滿意作品，「個景冇乜點變，咁啱又有小巴啱番個位。」

《文雀》＠中環石板街：《文雀》中的林熙蕾，這張相在IG上還未發布。

為張相踎成個鐘　影《幻愛》場景爆紅

至於這個IG專頁，也沒有想過要用來賺錢。「原本係一個new media project，見到外國有人做又試吓。開頭諗住做功課，不過做落又覺得好有趣。」圍內看得最多舊片的Coco說。四個月來已經有8,000追蹤者，每個post都吸到過千like，「係因為我哋影過幾張《幻愛》嘅實景劇照，女主角Cecilia（蔡思韵）分享咗，之後電影公司Golden Scene又有分享，就開始多人知多like。」《幻愛》？不是只愛舊電影？「梗係唔係啦，而家都有港產片好睇嘅，唔係合拍片，而係《幻愛》、《金都》，早少少嘅《淪落人》呢啲，夠寫實，講香港人情味、社會議題，都吸引到後生嘅睇。」阿佳說很喜歡《幻愛》，「嗰排戲院未閂時入場睇咗兩次，就喺trailer cap幾張圖。因為之前幫人做功課搵過景，知道嗰條隧道喺邊，喺火炭、禾輋嗰邊，就去影咗相。不過影完，負責QC（quality control）嘅阿King唔收貨，話嗰幾條柱唔對，於是第二晚再去影，踎咗喺度成個鐘喺唔同角度影，最後都係用返第一日影嗰張。」阿King除了做QC，也有出力，「蝴蝶邨輕鐵站嗰張就係我影嘅，因為我住嗰頭，日日見到嘅風景喺電影入面出現，感覺都幾特別。」

近年北上神州賺人仔的電影演員不少，要失望的也不只一個，但四個人都提到梁家輝。「嗰啲魚毛蝦仔就算啦，但梁家輝佢真係識做戲，搞笑又得，認真又得。《92黑玫瑰對黑玫瑰》好好笑，扮呂奇又似，《寒戰》又有戲味，佢係一個好戲之人，可惜對佢印象落差太大。」

《妖獸都市》＠金鐘力寶中心旁行人天橋：新作品有《妖獸都市》，阿佳說：「徐克拍戲以前好踩界。」

《賭神》＠太子站外：相隔三十一年，太子徹底變了樣，但陳刀仔找回「朱古力波」一幕則長存觀眾心中。

《胭脂扣》＠石塘咀山道：Coco最愛作品是《胭脂扣》，「去返拍攝現場，好似大家喺同一個空間咁。」

現實比電影荒謬　「而家睇笑唔出」

說起周星馳，阿King說：「最鍾意《國產凌凌漆》，古明華同佢哋bye bye嗰度。」以前笑是因為覺得劇情荒謬，現在現實的香港，更荒謬都有。「所以有啲位，而家睇都笑唔出喇。」Coco說以前超愛周星馳，但現在少了一點親切感，「全部都係合拍片，啲演員都唔係香港人熟識嘅，少咗啲親切感。我最鍾意《胭脂扣》，有梅姐同哥哥，活喺心中嘅人永遠不變，最好，而且電影真係拍到香港好靚。」

Coco最愛港產片是《半支煙》，因為電影中的香港和旺角很美。

阿佳說港產片看得最多是《賭神》系列，因閒時亦有賭波。

阿King說對合拍片興趣不大，「一定要邪不能勝正，會影響創作。」

Tom最愛杜琪峯作品，「最愛電影當中嘅命運觀。」

不過都有希望的，阿佳說：「古天樂同發哥都冇令人失望，至少冇支持錯嗰邊，都見過佢夠膽出嚟話政府做錯。古天樂又好支持香港電影行業，開《明日戰記》呢啲，都幫到業界。」阿King說：「新一代肯發聲嘅都唔少，好似劉俊謙，繼續表達自己想表達嘅嘢，創作自由同言論自由係相等嘅，尤其做創作做藝術嘅人，應該唔可以冇。」還有一位殿堂級的演員，「黃秋生，佢一直都演得好好，又為咗企出嚟發聲而犧牲好多，佢係真正嘅香港演員，真正嘅香港影帝。」

映遊舊戲 Instagram @throwbackhkfilmstory

採訪：陳孝義

攝影：蕭志南