大叔的愛 阮德鏘

 大叔的愛　阮德鏘

阮德鏘說，疫情之前，他是每日開足18個鐘的天生工作狂。這時候，粵劇場次全部取消了，但他依然開足turbo，轉營口罩廠，連湯包都親自送埋，下一步想賣和牛；最近發展網台事業，每星期主持《娛樂大叔》，鬧鬧無綫港姐馬虎製作，又呃到like。

「我哋有三分二嘅人轉咗行，有啲音樂師傅，朝頭早去賣生果，夜晚去做喃嘸，有啲去咗做Uber司機，有啲走去賣洋酒⋯⋯」41歲的阮德鏘也瓣瓣撈，不過始終最愛粵劇。

■41歲的阮德鏘，7歲已經入行，幾乎瓣瓣撈勻，一生最愛始終是粵劇。

身為阮兆輝和尹飛燕之子，阮德鏘自小在梨園長大，童星出身，在港台做過播音員拍過教育電視，再到北京學京劇，「返嚟之後去過加拿大，嗰時97準備搞移民，後尾唔適應，返嚟做返全職戲曲演員，跟住就同老竇擘面，去考TVB，之後就上咗內地！」

輾轉又回來最愛的香港。以往是「阮兆輝之子」，今天可以獨當一面，有經歴的大叔分外看得開，「有時唔認得又唔使太介懷，我叫阮德鏘囉，你認錯咗呀，我唔係羅君左，我係阮德鏘。使乜介懷啫，我哋係演員，唔係明星！」他就是阮德鏘。

撰文：文嘉龍

■阮德鏘（右）每星期在YouTube頻道「囍趣台」主持《娛樂大叔》節目，首集高潮位是大彈港姐騷。互聯網圖片

■譚炳文（左）和尹飛燕（右）相識多年，Uncle炳更是由細睇住阮德鏘大，是個重要人物。微博圖片

Uncle炳乜都肯去試

阮德鏘得到過很多叔父前輩的愛。睇住他大的譚炳文是其中之一，他口中的「Uncle炳」，在自己的人生歷程裏面，是一位重要人物。阮德鏘十多歲時，人生第一次當上戲曲司儀，多得Uncle炳帶他見識大場面。

那一年，阮德鏘的媽媽尹飛燕和幾位老倌要到澳門為一個有錢人家演出，尚欠一個司儀，譚炳文看見十多歲的阮德鏘也可勝任，譚炳文說：「帶埋佢去啦！」尹飛燕卻說：「嘿，佢門口狗嚟嘅，你見到就好過癮，一出到去就腳軟㗎呢個嘢！」Uncle炳苦心：「咁我帶住佢囉！」Uncle炳帶住，阮德鏘順利完成人生第一次當戲曲司儀的機會。

阮德鏘小時候在港台跟過鍾偉明大哥當播音員，配音出神入化的譚炳文曾對他說：「你播音都做得，不如你做埋配音啦！」問題來了，播音靠把聲，配音除了把聲，還有「數嘴」夾口形的技巧。好了，Uncle炳即場訓練，找來林保怡的一段戲要阮德鏘配，「死喇，林保怡講嘢，數唔到嘴㗎！」向Uncle炳求救：「冇擘過個口喎！」Uncle炳話：「你睇睇佢有冇唞氣位，或者喉嚨位嘴位，你細心睇！」阮答道：「睇唔到喎，成份稿講晒喇，邊度開口呀？」如今說來，阮德鏘形神俱在聲演當年那一幕，現場哈哈大笑，「真係搞唔掂呀！」

又如他考入無綫訓練班後，常在飯堂遇上譚炳文，「佢係食家嘛！」那時有新舊canteen，Uncle炳總會經過他身旁拍一拍他，「今日舊can好嘢呀，個蒸雞好嘢呀，新can啲嘢唔得，今日唔知係咪輸馬呢班友，啲嘢唔得呀！」每次遇上都有「炳哥推介」。又正如他要到戶外演出預備音樂，Uncle炳都有辦法，「Uncle炳話不如畀隻MD你啦，嗰時仲有MD，《舊歡如夢》唔使記曲就最好，係喎，唱來唱去都係幾句，氣氛又好，唱唱吓原來副歌佢自己唱返，變咗譚炳文把聲，我要大大聲遮住佢囉，自己都覺得好笑！」點滴往事，都付笑談中。

Uncle炳走了，阮德鏘最大的感觸是Uncle炳乜都肯去試，「我覺得有好多叔父唔係咁，好似我爸爸，佢係會拒絕，Uncle炳就會勇於去嘗試一啲嘢，去接觸一啲新事物，甚至乎佢話有時同啲後生拍戲同配音，佢都有得着，我覺得佢係一個特別嘅人物囉！」

■去年尹飛燕（左）舉行入行55周年演唱會，阮德鏘（中）和阮兆輝（右）出力支持，一家三口難得同台演出。

■阮德鏘自小在戲行長大，邊式武小丑，鬚掛紅黑白，他樣樣做齊。互聯網圖片

俾老竇推走我碗飯

阮德鏘自己也是乜都肯試。他在嶺南中學讀到中三投身戲行，別人以為他是阮兆輝和尹飛燕的兒子，萬千寵愛在一身有父母庇蔭，當然不是。「其實係我瓣瓣都撈唔掂，因為我細路仔做童星，到轉聲時候冇得撈，我又試過去做便利店，做過拓冷氣，我乜都做！好多第二代，老竇老母好錫啲第二代，我老竇老母啱啱反轉。我老竇嘅意思係，趁老竇仲睇得到你嘅時候，多啲去闖禍、多啲去學，你跌低仲起得到身，到我七老八十你先嚟闖江湖，死啦！」

嚴父出孝子，但阮兆輝和阮德鏘的父子情，曾經一度決裂。阮德鏘小學時父母已離異，家姐跟媽媽，阮德鏘說：「我兩邊其實都冇乜點跟過，因為我媽媽帶咗家姐走，我跟我爸爸嘅時候，其實我爸爸都居無定所，於是我就跟咗大嫲嫲！」

父子關係這麼近那麼遠，「我自細就去做拓冷氣，職業冇分貴賤，總之你搵到食就得，一個人到咗18歲，冇人要為你人生負責！所以啲人話，因為佢老竇老母，佢就多班做，如果係行內人就會笑囉，因為我所有戲都係同我老竇對頭班，好多人會話你老竇帶住你係咪會好啲？冇，從來我老竇都唔帶，有二分一機會，一個係你個仔、一個係人哋，佢都係推介人哋，唔畀自己個仔去，我老竇就係咁！我難得搵到啖飯食，最後二分一個機會，我都畀你推走我碗飯，阿老竇點先？你一係畀條路我行，你唔畀我行仲推走我碗飯，我就反面，我以後唔做大戲，我去考TVB藝員訓練班。我最記得，我係考咗簽埋約，我先至同佢哋講，我話老竇，我𠵱家唔做，我聽日就唔做，擺明反面囉！」

2000年阮德鏘考入無綫藝員訓練班，他第一個打招呼的人，是羅天池，他倆自小認識，羅天池也是戲班仔，他父親是戲曲音樂家。「嗰時其實冇人知（阮兆輝之子），包括羅冠蘭（訓練班導師）都唔知，Koon Lan老師係畢業先至知！」他更想過改名換姓，「我想有個新開始，曾經諗過改過一個名，直頭連姓阮都唔姓，重新開始我嘅新生活，後尾又覺得其實有好多嘢係你好難擺脫，即係經經（楊天經），佢一世都係陳寶珠個仔，佢唔可以話唔係陳寶珠個仔。」

第一套接拍的電視劇是《烈火雄心》，「嗰時要搵一個後生仔識唱大戲，王心慰（監製）就揀咗我，嗰期好得意，開完《烈火》就要開古裝，要識武術，我大戲食晒啦！老實講，佢哋覺得一張A4紙啲對白好難講，我背開三本書咁厚（戲曲），一張紙，咪玩啦！」

■阮德鏘和湯唯在《色，戒》內是對冒牌夫妻「麥先生，麥太太」，一夥人密謀刺殺行動。劇照

■2007年《色，戒》首映，阮德鏘（左）帶同媽媽尹飛燕（右）捧場，與李安導演（中）合照。資料圖片

第一嚿錢因為李安

在無綫只短短4年，阮德鏘拍劇主持乜都做，《K-100》有他，連只得一場戲的《鳳舞香羅》和得一句對白，演一個游泳比賽司儀，只喊一句「比賽現在開始」的《戀愛自由式》，只要有騷得計，他都照接照演，高峯期他在無綫有月入6萬收入。

「我為搵錢，嗰段時間不停拍，去完《大唐雙龍傳》嗰9個月，之後返嚟就轉『一騷』，即係公司覺得你好，加你50蚊，但係要同公司共度時艱，cut到得一騷！我仲唔知，如果我𠵱家簽，幾蚊一個騷？一年即係幾錢呀？即係加多50蚊，咪就係千幾蚊加多50蚊，就係你一年嘅人工！我話，吓，我以為係每個月有一個（騷）！」

2004年離開無綫後，阮德鏘到北京搵食，萬料不到會有機會演出李安的《色，戒》，他就是戲中的麥先生。有一日，阮德鏘接到當年認識的一個副導演來電，「德鏘呀，李安搵過你！」他尚未回過神是那位副導演，以為是白撞電話，他說：「係呀，成龍都等緊我期，咪玩啦！李安，係咪儍㗎，《斷背山》（Brokeback Mountain）個導演搵我，你咪當我儍先得㗎！」再三確認，才知李安真的要找他試鏡，「跟住我第二個電話就打畀羅冠蘭，Koon Lan老師，大件事喇，國際大導演李安搵我呀，佢叫我試鏡，我需要啲乜嘢準備呀？」老師氣定神閒答他：「人哋李安荷李活導演用你條死茄哩啡，人哋都未驚，你驚乜啫，你上去啦，你nothing to lose，你冇嘢輸呀！」

試鏡成功，前後要增肥50磅，已經180磅的他，增肥過程辛苦但亦令他眼界大開見識了荷李活製作，酬勞更是荷李活待遇，「你諗吓我後期係可以一炮過買架Benz同埋還埋太子道嗰啲單位，我阿媽供緊嘅單位都可以搞掂晒，所以我第一嚿錢係因為李安，同埋後尾佢又有啲分紅呀，總之有好多錢會畀返你，嗰嚿錢對我嚟講係好開心，離開咗TVB咁耐，一路咁Q窮之後，有份咁穩定嘅長糧，拍兩年喎，前期差唔多一年，拍攝差唔多一年！」

被大導演睇中，阮德鏘沒有深究原因，但他認為可能是在《獅子山下》演出過一個劇目《夜貓》有關。2007年拍完《色，戒》後，他一樣中港兩邊走，直到2012年，父親難得開口叫他回來合作搞戲曲製作，他才正式回港，父子關係亦得以重修。「其實嗰時我係好感動，因為我老竇冇乜試過情深款款咁同我講，佢亦都講得到佢攰嘅原因，因為佢脫咗節！我今年41歲，我7歲入行，三十幾年光陰，我都係喺度學緊嘢！我今日嘅承傳就係，我老竇教幾多，我做返幾多，冇一下多，冇一下少！」

做人做戲如是，不多也不少，剛剛好。

■2018年阮德鏘與林司敏結婚，婚後誕下女兒阮婧恆，小家庭大快樂。

【後記】天生愛情狂

阮德鏘2018年與林司敏結婚，女兒阮婧恆今年兩歲。兩公婆結緣於《天生愛情狂》。

「我太太以前係林小明間公司（寰宇電影）。我嗰時聽爸爸講返咗嚟香港，最初梗係冇得撈啦，加上我老竇把口，有都撥開咗你啦！我休閒當中就收到田雞（田啟文）電話，有個導演叫葉念琛，你有冇興趣呀？有一兩組戲！冇得撈乜都有興趣，我第一日見我太太嘅時候，我個造型係俾人淋油，有一個shot係我同湯怡同佢，每邊畀我搭住膊頭，因為嗰時肥，膝頭哥痛就聚晒所有力落去，湯怡就即刻藐我，但係佢就冇乜點藐我，就係咁識咗，慢慢就一齊！」

其間化妝師遞上一罐紅色可樂，阮德鏘好大反應要換罐黑色（零糖），「唔得㗎，老婆鬧！」大叔怕老婆。

化妝：Jessie Chan

髮型：Vanessa Kong of HAiR

鳴謝：山日比製作有限公司