是日心情不爽，又禍不單行，在飯局碰上一個持加拿大護照的律屍J大放厥詞，講什麼「有國先至有家吖嘛，梗係支持國安法啦」，一向保持中立兼港豬形象的我，決定今天獎勵一下自己，懲罰一下對方，暫緩「沉默是金」原則，攞呢位「愛國」律屍出一出悶氣。
我堆起笑容問道：「J律屍，嗱我就唔識政治，不過啲死廢青一聽到『沒有國哪有家』就唔順超，你識咁多嘢，不如教吓我哋點樣駁啲廢青都好吖，到底『沒有國哪有家』係點解究呢？」J好像有點詫異我有此一問，連忙托一托眼鏡，猶豫兩三秒才說：「好簡單啫，國家、國家吖嘛，有名你叫，咁國同家點可以分離呢？」
我拍案說：「嘩，咁講法你咪食屎！」眾人都紛紛向我投以好奇眼光，律屍J也秒答：「點解呀？」我說：「你專做離婚官司㗎嘛，夫妻、夫妻，有名你叫啦，咁夫同妻又點會離婚呢？冇人離婚，你仲唔食屎咩？」他一時想不出怎樣答，只好先喝一口茶。所謂「敵疲我打，敵退我追」，我連忙向J做個道歉手勢，說道：「唔好意思唔好意思，粗人呀，我哋呢啲係粗人，講嘢吳京大腦。不如你講返點解『沒有國哪有家』先啦，我仲未get到呀！」
律屍徐徐放下手中茶杯，以舌尖潤一潤嘴脣才說：「嗱，國同家嘅關係就好密切嘅，唔同夫妻，我覺得你比喻唔好，要比嘅話，應該講父子，冇老豆老母，咁係咪冇仔女先？」座上客很多都點點頭，「係喎，係喎」之聲此起彼落。律屍J見聽眾反應熱烈，馬上綻放微笑，彷彿一個在舞台上表演完畢的演員，躊躇滿志等待歡呼和掌聲。
這時候我又拍一拍枱，有點激動地說：「嘩，你唔好咁講𠻹呀，分分鐘畀你累X死呀！」眾人紛紛向我投以好奇眼光，律屍J問：「點解呀又？」我說：「咁仔女大個咗會獨立㗎嘛，獨立咗咪唔使靠老豆老母囉！唔通你第日釘蓋，個仔會喊晒口話『阿爹，你唔好死！你死，孩兒同你一齊死』咩？你講父子，咪畀位班港獨廢青去入你囉，佢哋即刻會話：『父母養大仔女，個個都想佢哋獨立，所以香港獨立，唯一出路！』如果我學似你咁周圍講國家如父子，咪變相幫港獨搖旗吶喊，想累死我咩？」
律屍J也老羞成怒：「喂你老馮係要駁我㗎喎，唔好講咩比喻，乜世界上會有國而冇家嘅咩？你舉個例子聽下！」我說：「你問我邊度有國冇家，呢句話本身就有邏輯問題。『沒有國哪有家』，表示國係家嘅必要條件，唔係充分條件；你想引導我反駁呢句話，係應該叫我舉個『有家冇國』嘅例子至啱。喂咁好簡單啫，唔通你未聽過猶太人？公元2世紀羅馬帝國鎮壓猶太人，成個民族一直流離浪蕩，直到1948年以色列先重新立國，咁請問1948年之前猶太人係咪冇家呢？」J這次反應敏捷地說：「就算冇以色列，佢哋都有其他國籍㗎嘛，咁咪即係點都要有個國囉！」
我說：「你咁講法有兩個問題。第一，你知唔知愛因斯坦16歲嗰陣為咗逃避兵役，得到老豆批准，主動放棄咗德意志帝國國籍，做咗5年無國籍人士呢？愛因斯坦乜國都冇，但仍然仲有家喎，所以事實係冇國一樣可以有家。第二個問題仲嚴重，你話有國籍就得，咁即係唔一定中華人民共和國啦，好似你咁，有加拿大國咪有家囉，中華人民共和國關你咩事呀？
「再答返你第一條問題，你問我邊度有國冇家，咁你聽過『耶路撒冷、羅得島和馬爾他聖若望主權軍事醫院騎士團』未呀？呢個係世界上最細嘅主權國，簡稱馬爾他騎士團，佢嘅國家地位得到聯合國承認，仲同過百國家有邦交，有自己嘅護照郵票，仲發行過一隻叫scudo嘅貨幣。但馬爾他騎士團係冇領土嘅，只係喺羅馬有個馬爾他宮，全國公民得三條友，都係大臣。馬爾他騎士團呢個現實例子話你知：有國唔單止可以冇家，甚至可以連領土都冇。」
見J律屍鐵青着臉，我連忙做個道歉手勢，笑道：「唔好意思唔好意思，粗人呀，我哋呢啲係粗人，講嘢吳京大腦，不如大家都係食飯先啦，飲杯飲杯！」
沒有留言:
發佈留言