年輕人的確被洗腦 - 馮睎乾

年輕人的確被洗腦 - 馮睎乾



日前經民聯張華峰在立法會提出休會辯論，商討在目前極緊張的時勢下，社會該如何恢復平和？這題目很有意思，適合中學生用來進行小組討論，但由建制派探討如何恢復社會平和，就好比由精神病人來研究如何保持理智，香港人聽了應該欲哭無淚。結果有何高見？

民建聯梁志祥認為大多數示威者都很年輕，質疑他們自小被洗腦，沒接受國民教育，不認識內地法制。經民聯梁美芬則歸咎於通識科，指它沒有好好培養學生的品德。

不談政治，只講論據：梁志祥、梁美芬作上述批評時，有接觸過任何他們口中的「年輕人」嗎？沒有調查研究，就沒有發言權，更沒資格判斷他們是否被「洗腦」。雙梁所言，不要說是否「持平」，根本連最基本的論據也欠奉，完全就是廢話。做立法會建制派議員，確是絕世筍工。不用腦，不要臉，不調查，不研究，不做功課，時候到了，自然就有薪酬。

我當然沒徹底調查過年青示威者的想法，但認識幾位九十後和00後，也跟他們談論過示威的動機，結論如下。

第一，有年輕人的確被煽動了。A是中學生，朋友的女兒，六一六遊行前，我問她為什麼參與示威，她說：「（六月九日）一百萬市民反對逃犯條例，但林鄭都唔理，話繼續二讀，我哋個個同學都好嬲，有人仲喊咗出嚟，話『點解會有啲咁嘅政府㗎』，所以我哋決定要自己行出嚟。」年輕人的確被煽動，而煽動者就叫林鄭月娥。

第二，有年輕人認為遊行示威有用。B是大專生，街坊，以下對話是六月九日後的事。B說：「我本來唔清楚咩係六四——」我（詫異）：「學校冇教過？」B（斬釘截鐵）：「冇。」「你喺香港讀書？」「梗係啦，我喺香港出世㗎（按：她生於九七後）。但今年係六四三十周年，好似突然多咗好多人講，又有好多人參加六四集會，我就好奇，自己上網睇紀錄片，先知原來有件咁嘅事！我忽然覺得好恐怖，點解六四咁大件事，學校咁多年都唔提？就算以前有集會，我哋都冇同學留意。如果唔係仲有人紀念，仲有人去維園，我諗我呢世都唔會知㗎喇。如果今次反對逃犯條例，我哋唔行出嚟，過咗十年廿年，下一代就唔知曾經有人反對過，學校亦唔會提，就算呢條法例幾有問題，都唔會有人再質疑。」我：「即係話，你今次出去示威，反而係畀六四集會影響咗？」B：「少少啦。遊行示威係未必改變到政府，但至少我將來嘅仔女會知道我盡過力。」

第三，有年輕人的確被洗腦。C是九十後，在職人士，常常與朋友結伴到大陸吃喝玩樂。問他為什麼反對逃犯條例，他說：「我有睇大陸新聞㗎！你有冇聽過成都七中實驗學校呀？」我（想了一下）：「有少少印象，好似話學校畀啲過期發霉嘢學生食，搞到家長上街，之後點收科我就冇留意。」C：「冇錯吖，係今年三月嘅事，家長上街，然後官方就出動辣椒水同催淚彈驅趕佢哋。件事搞大咗之後，四川警察就突然搵到新證據，話有三個家長自己整污糟啲食物，造假拍片擺上網，要告佢哋尋釁滋事。原告變被告，呢啲咪中國法制囉。球證旁證，主辦協辦，全部都係佢嘅人，點同佢鬥呀？話行得正、企得正就唔使驚送中？講呢啲嘢嘅廢老，有冇睇過大陸新聞㗎？」有年輕人確被洗腦，但不是被黃絲教師洗，而是中國熱門新聞。最需要國民教育的，是梁志祥梁美芬這類無知的議員，而非飲喜茶的新一代。