高鐵高到你感恩落淚 - 鄧達智

高鐵高到你感恩落淚 - 鄧達智




香港人不識大體，真係幫唔落，好嘢嚟㗎，高鐵！
天朝領導點會俾條廢鐵我哋啫？
高官、議員、俊傑就識貨嘞，唔止四萬，直情八萬咁笑着坐上高鐵首行；心花怒放到呢，怕且除咗輕鐵、地鐵、九廣鐵，乜鐵都唔識，未出過門，冇搭過日本新幹線，冇搭過歐洲Eurostar，今次真係大開眼界，點會唔笑到眉飛色舞？
香港人就好心學吓嘢啦，唔好淨係識條鐵；搭高鐵上深圳北站14分鐘，雖然北站返深圳巿區巿中心可能用上一個鐘。不過轉車去汕頭、去廈門、福州、溫州、杭州，州州通都係十個八個鐘，方便到不得之了。
48分鐘上廣州南站，雖然南站冇雷公咁遠，簡直舉目無親，返巿區比48分鐘更長，不過祖國建設成果之強勁正好趁機細究。廣州南站其實遠達番禺，人家富裕縣巿隨便比港燦有錢得多，綠化環境指數頗高，香港更加拍馬都追唔上，搭乘高鐵北上，就學習國家今天如何強已值回票價。
有高人提議搭高鐵上廣州，住一晚，然後飛往其他地方……咁為香港人設想，真係用心良苦。舊時代，鄉下人搭船、搭飛機出國，同樣在前一天長途跋涉出巿區，住親戚家一晚，次天不用急不用趕才去機場去碼頭；怕且高人鍾意懷舊，又或者預見日後大灣區以廣州馬首是瞻，坐高鐵去省城，再轉其他地方，這思維實在高到你流眼淚。
想起80年代末去青島；同樣都係先搭直通車上廣州，到埗後在舊火車站對面的流花賓館落腳，即到售票機關撲飛前往青島。
問清楚，啊……那兩天沒機飛青島，沒問題；先飛北京，到京後再找飛往青島的機票。
找不到？
也沒問題，坐十二小時火車到青島，沿途風光如畫，刺激創意思維，將不少工作完成。
廿多三十年前的路線圖，竟然有後生仔覺得wonderful， 二次創作；真係優質俊傑，首先將香港為亞太區航空中心的身份淡化，向下調整降低地位，特區淪為三線城市指日可待！