近日被「佛系」潮圖洗版，連內子也饒有深意傳來一張「佛系老公」圖，上書：「不理老婆發脾氣，不理梳化上的衣服山，不洗碗，不吸塵，不做任何家務，如果緣份到了，老婆自然會做晒。」
我沉思片刻才鄭重回應：「做佛系老公，唔係咁易㗎葉師傅，好明顯我未夠道行。如果真係要我佛系，頂多只做到半個佛系專欄作家：『不想題材，不動筆，不理編輯發脾氣，不理短訊催稿，不接電話，如果死線到了，自然會交到稿。』我仲未看破死線，到看破咗，就可以視乎緣份交稿，成為真正嘅佛系專欄作家嘞。」
內子說：「唔係喎，除咗報紙專欄，聽講你已經看破晒其他死線啦喎──」
我掩着她的嘴，冷靜地說：「你聽過佛系政府嘅四大條件未？」
她搖搖頭。於是我耐心解釋：「朱光潛有一篇〈談理想的青年〉，話青年人想成功，需要四個條件：運動員嘅體格、科學家嘅頭腦、宗教家嘅熱忱、藝術家嘅胸襟。佛系政府，同樣需要四大條件。」
「一，陳茂波嘅頭腦：識得將簡單問題，搞到複雜過量子力學，最後大家計過數，都話：『解決問題嘅代價，貴過唔解決，咁不如唔好解決。』阿茂教曉我哋：無能政府解決問題，唔一定要解決問問題嘅人，只要你以『解決問題』嘅名義，製造更多問題，咁大家就唔會有慾望解決原初嘅問題，呢啲叫『佛系解難』，Fuxkhai Problem Solving。二，鄭若驊嘅熱忱：佢熱心加入政府，林鄭話『犧牲好大』，所以即使知法犯法，大家都唔可以咄咄逼人。你睇，佢依家乜事都無，你話嗰份熱忱係幾緊要呢。三，林鄭嘅胸襟：佢越嚟越唔介意批評，就算話佢『擦鞋』，都要大讚習近平，有咁嘅胸襟，就算乜都唔做，緣份到了，自然可以連任。第四個條件最重要，就係有一大群佛系市民：不關心社會，不思考未來，不抗議，不批評，如果緣份到了，自然會有政府派錢。」
沒有留言:
發佈留言