【你而家先話搞返好頭家？】史健仁

史健仁

20230814

【你而家先話搞返好頭家？】

係你叫後生仔北上讀書，係你叫香港老闆北上創業，係你叫香港人融入大灣區生活，係你班親中愛國藝人及KOL不斷推廣港人北上居住，咁香港人咪緊隨中央總路線，聽晒你話融入大灣區生活囉！

如是者，好多有消費力嘅香港人都搬咗上去住，或放工就上去過夜，到頭嚟搞到香港夜晚死過臘肉，酒樓餐廳8點後員工多過客人。而家香港政府真係搞到大灣區夜市好活好旺喎，香港政府應該好滿意自己政績架，點解忽然間話要搞活搞旺「香港夜市 」？

最重要嘅問題，指望邊個去搞活搞旺呢個所謂嘅夜市？

靠香港打工仔？佢哋好多放工買個兩送飯就趕返屋企，食完就睇劇或打機，然後就訓覺，聽朝6點半要仆起身。佢哋從來都冇乜夜生活，點樣突然間幫你搞活搞旺「香港夜市 」？

到時你靠大集團大企業搞嘅所謂夜市，8粒魚蛋賣40蚊，4條腸粉賣50蚊個陣，我平時夜晚食兩送飯醫肚架渣，邊有能力幫你搞活搞旺呢個咁嗱貴嘅夜市呀？有自知之明既，都唔嗱會行入去啦！

有消費力，夜晚出慣街蒲開嘅個班香港人，當中一部份已經移咗民，淨底個一部份有唔少係深圳或東莞按緊泰式或推緊油，你發個微信叫佢趕返落香港幫你手搞活搞旺「香港夜市 」？你即係叫佢哋唔好係上面推油，唔好食火鍋雞煲，彩你都有味啦！

你會唔會推翻自己當初融入大灣區生活嘅總路線，並禁止港人北上消費玩樂？更係唔會啦！

從第一日開始就先顧全大陸，先幫大灣區復甦。而家大灣區真係復甦緊啦，真係人流迫爆啦，然後先發覺自己忽視咗香港，你冇嘢呀嘛？

形象化啲去講，即係你只顧氹出面二奶三奶開心，啲錢投放晒佢哋身上，扮到佢哋靚一靚，屋企個件一個人湊大兩件，搞到自己又老又殘。有一日，佢提出離婚，要同一對仔女走，個陣你先發覺原來自己一直忽視咗佢哋，你先話要搞返好頭家？

食屎啦。