香港電影宣發的典型盲點 — 以《陰目偵信》為例

 

Happy Kongner 快活角落頭

20230821 

#opinionkongner : 香港電影宣發的典型盲點 — 以《陰目偵信》為例

事先聲明，我就未睇《陰》，所以我唔會評論呢套電影好唔好睇，我想講嘅係最近圍繞呢套戲出現嘅兩件事，事實上係反映咗香港嘅文化界從業者嘅一啲問題。

自《陰》喺 8 月 10 日上映咗之後，票房一直都陷入低迷。根據資料顯示，電影上映後一週票房就只係得 220 萬，而呢套戲嘅成本係 1100 萬。換言之，以慣常分成計法，呢套戲至少要 3000 萬先至叫做回到本。而再用首週票房推算，呢套戲回本嘅機會幾乎係接近零。結果監製戴栢豪就喺佢嘅 IG 寫咗一篇文，講出咗佢嘅感受，詳情你哋有興趣自己可以去睇，我喺呢度就唔覆述太多，

戴整篇文入面 我有啲位係認同，但有啲位我認為係反映出喺香港做文化嘅朋友好多時都會出現嘅問題，就係動不動就會出現「無力感」。戴喺文中指出，因為觀眾嘅不理性負評而產生出「孤立無援的無力感」。呢種「無力感」係源於製作團隊「拼盡所有」但依然得唔到欣賞，反倒受到唔少謾罵而來。然而，戴文中提及嘅嘢引伸至嘅嗰種「無力感」，其實喺而家嘅社會環境嚟講都唔係真係咁無力，你套戲拍完上都唔畀上，甚至畀個國家封殺先嚟講無力感都未遲啊。一套電影重有投資重有得上映，無力感又從何而來呢？歸根究柢都係因為唔賣座有人負評。但你問我，《陰》票房失利其實係可以預見，唔係因為佢好唔好睇，而係因為個宣發。

好多人都會覺得，電影賣座與否，係同佢好唔好睇有關。不過事實上，好睇與否呢樣嘢其實係好主觀，姐係《極悍巨鯊2》票房好過《奇異女俠玩救地球》好多倍都好，唔通兩套戲有任何可比性咩？定位唔同，做法亦都唔同，前者唔會同你 Sell 人文價值，後者亦都唔會同你講佢係全年齡適合。咁所以兩套戲會以唔同嘅方式做宣傳，合理不過。問題係，《陰》又做咗啲乜嘢宣傳？無論我喺 Google 定係 YouTube，基本上我都見唔到有太多同《陰》有關嘅宣傳，咁究竟點解會覺得連宣傳都無乜嘅情況下，套戲係會有機會賣座呢？就算之前我喺直播度有討論過《燈火䦨珊》嘅票房失利情況，其監製陳心遙都有寫咗篇千字文嚟表達票房失利呢種無力感。而相比起戴而言，我不得不承認陳花喺《燈火䦨珊》宣傳上嘅心思係好多，只不過問題出在佢犯咗兩種宣傳大忌，就係「自我感覺良好式宣傳」同埋「藥石亂投式宣傳」。而《陰》呢套戲，唔好講話有犯宣傳大忌，因為係連宣傳都幾乎無。有幾位係原著 Fans 嘅弟兄同我反映，佢哋連套戲上咗都唔知。咁連有機會睇嘅原著 Fans 都唔知，你又點樣會期望有人係會自動自覺入場睇呢？

戴講出咗香港電影製作嘅預算係「茶餐廳的價錢」，所以期望有「高級酒店的標準」係唔合理。單從創作限制嚟講，我係同意嘅，始終有啲嘢真係一分錢一分貨。問題係，我認為就算只係得「茶餐廳價錢」嘅 Budget 都好，其實都絕對有方法提供得到超越「高級酒店標準」嘅創意同心態，重點係你有幾在乎你嘅創作。我經常都會講，創作係一種自我修業，喺創作路上會否進步係來自於創作者對自身嘅不滿足而來。覺得現時業界好多嘢都不足，咁咪諗方法超越佢。不過我係見唔到大家有任何概念係想改變現狀，係想令到個業界變得更好。而單從電影嘅宣發上面你係會好明顯見到，香港係落後到不堪入目，然後大家又容許佢繼續不堪入目。

老實講，我到而家都唔明白，點解好多港產片都可以係咁。明明你都已經係用七八位數字嚟拍套戲，我都唔知應該係話大家係大膽有自信定係點，居然可以對電影宣發係接近置之不理嘅狀態。當你做晒所有你可以做嘅事，結果都不如預期，盡咗力都無用咁當然係無辦法，但乜都無做過，結果出到嚟炒晒車，跟手就話有無力感，咁唔會好奇怪咩？真係下下靠奇蹟？咁所以你問我，如果《陰》唔收得其實係好正常，因為喺近乎無乜宣發之下都收得嘅話就真係只會係奇蹟。

至於 193 嘅「謝票並唔係義務」論引起嘅爭議，有人指責 193 「大牌」或者會「影響咗成齣電影有份參與的人」，甚至有評論認為謝票係演員嘅「道德責任」，我實在不敢苟同。呢樣嘢亦都反映出，無論係喺香港拍電影嘅定係睇電影嘅，對宣發同演員嘅要求都係一種奇怪嘅偶像式 Fans service 理解，而唔係用心去諗究竟咩叫做宣傳。

老實講，我本身唔係太過在乎有無人謝票，因為萬一套戲唔啱心水但又有人出嚟謝票，咁場面就會非常尷尬。而從偶像嘅角度而言，193 謝票與否可能重有討論嘅空間，但就演員嘅角度而言，193 謝票與否其實真係唔係義務，合約話要咪謝，唔使咪唔謝，其實好簡單，所以我覺得唔謝票係無任何問題。問題反而係，點解大家覺得電影製作團隊就一定要謝票？甚至當有人講到呢個係演員嘅「道德責任」嗰陣，我又真係想知，有邊一個戲劇理論係提及過演員嘅道德係同謝票有關？如果真係要講演員嘅「道德責任」嘅話，唔係應該係做好齣戲咩？

天下無易成之業，而亦無不可成之業。電影要賣座都係一樣。做出水準或水準以上嘅創作同演出，呢個係創作團隊嘅「道德責任」；用盡方法去令到好嘅創作可以得到眾人嘅注意，呢個係宣發團隊嘅「道德責任」。而唔係應該做嘅嘢唔做，唔應該做嘅嘢就做足；一定要做嘅嘢就唔做，唔一定要做嘅嘢就要求人做。各守乃業，則業無不成。文化產業發展亦是如此。