無啦啦五千幾人取消捐器官登記 陶傑

 

陶傑 

20230522 

無啦啦五千幾人取消捐器官登記，特府又發爛渣。大市都有上有落，特府衛生署認定器官登記數目如同樓市，永遠有升冇跌，係一種好搞笑的認知。

例如，移民的香港人多，做一個好市民，有始有終，好頭好尾，就梗係上網通知埋你取消器官捐贈登記。香港BNO移民英國，特府都會扣住強積金。BNO市民移民英國，想趁自己生勾勾時帶埋副腎同埋眼角膜走，留返去英國捐，唔通都屬於「軟對抗」的一種、觸犯「器官安全」？

又或者三年前登記咗，跟住Covid 中招，病過幾次，覺得自己污染過病毒，唔想連累大陸人民，取消登記，方係動態清零之後負責任的含淚大愛cancel ，並非惡意取消。

何況大陸14億人口，個Pool全世界最大，將二十七億五千副腎臟一字形排列，可以橫跨太空排到上火星（我知條數正常係28億，但另外嗰五千萬副應該已經冇咗）。祖國是香港最強大靠山。1998年金融風暴，最新公佈的真相，據說都係祖國動用儲備救助香港抗擊索羅斯成功。香港彈丸之地，要用器官救濟祖國，在邏輯上即係：馬雲與馬化騰來到香港，要唔要問深水埗的劏房租客借錢？

左膠不斷強調：This is my body. 個Body 包括器官，身體髪膚，受諸父母，如果你係中國人，一定會遵守此儒家古訓，你肯捐、佢肯捐，but 我係都唔Me Too，咁又吹咩。

器官可以捐，個善長仁翁諗諗吓，亦可以修改遺囑，上網取消唔捐，一切合法。香港講法治，若想全身器官由眼角膜肝臟腎臟到睪丸卵巢一概政治化，特府想做器官戰狼，搶人才、搶器官，則有如捐血，不如司局級官員、港區人大政協、立法會全體議員、18區關愛組、愛國大媽全家大愛無私，含笑帶頭登記，一定會大愛感動香港各界，包你D器官登記會好似新加坡的錢一樣滿瀉，焗住叫停。