我唔係姜糖，亦不算是鏡粉，play list入面一首鏡歌都無。

 

孫子然

20230512

我唔係姜糖，亦不算是鏡粉，play list入面一首鏡歌都無。不過，最近見姜濤在頒獎禮上因為逐一多謝隊友，而引來樂壇前輩極mean的人身攻擊，最後又搞到滿城風雨.......

除咗講一句，Viu同姜濤係時候要搵人睇風水之外，亦都好唔明白一件事︰究竟佢做錯啲乜，要俾人用粗口咁樣侮辱？

如果話佢逐一多謝隊友，係佔用air time扮偉大，咁我又唔明，佢做乜要將寶貴o既air time平均分俾11個隊友？自己講晒自己嘢，扮下喊搏多啲曝光咪仲好？

如果話佢未夠班坐到哩個位，未夠資格擁有咁多fans支持……咁我想問，點先算係夠班？唔通真係要好以CCTVB咁做到三四十歲先可以擔正做主角？fans係鍾意佢，咁又有咩問題？

有睇過全民造星o既人，應該都好明白要攞到個冠軍，比當年新秀一show定生死，係難十倍或以上。佢哋玩淘汰制，每次比賽壓力之巨大，每次對表演者的高要求，評判有幾mean幾harsh……比當年新秀係有過之而無不及，仲要加埋全民票選，攞到個冠軍，唔係實至名歸咁係乜嘢？

再者，由一個200磅讀書唔成o既死肥仔，變到而家成為超級偶像，單單係咁已經足夠勵志。我哋哩啲so call 前輩o既廢中，連個死人肚腩都減唔到呀！

重點係，其實佢有做錯過啲乜嘢？食粉絲？周圍搞大啲女個肚？吸毒？醉駕？非禮啲女演員？態度囂張目中無人？(同佢合作過的幕後或marketing都話佢態度謙虛有禮的)

佢只係多謝自己隊友啫；佢只係偶爾食肥咗少少啫；佢只係打波太投入跌跛腳啫；佢只係唱歌太興奮over咗啫……

唔好唔記得，佢只係得24歲。你同我o係24歲o個時做緊乜？可能連自己做緊乜都未知呀！

我哋出道時，好憎啲老屎忽成日嘰嘰吉吉，做乜都唔順佢眼。但當我哋到咗咁o既年紀，唔知點解就會成日覺得啲後生一輩哩樣唔掂o個樣唔掂。成日搬返舊屎出嚟同佢哋比較，成日話哥哥梅姐哩啲先係巨星，成日為鬧而鬧……

前輩，係會傍住啲後輩，當佢哋有需要，就提供一啲有建設性o既提點，咁先可以薪火相傳。當後輩唔順我哋意，唔跟我哋o既標準去做事，就乜都D一餐o個啲，叫做老屎忽。

唔好讓自己不知不覺成為當日我哋最憎o個種人。

仲有，mean人之前，唔該睇睇自己咩身世先，自己又好得人幾多呢？