大外宣災難 - 宋漢生

大外宣災難 - 宋漢生

中国病毒輸出全世界，大外宣乘勢自我吹奏，宣揚國力，明明出少句聲冇人話你啞，硬係要激到大家唔翻枱唔得。歐洲國家一向好少對中国公開落面，而家連奧地利傳媒都忍唔住狂抦。

#ChinaLiedPeopleDied已經變咗自由世界嘅共識，反中潮流浩浩蕩蕩，大追究迅速蔓延，美國議員動議de-list美國上市嘅中国公司，講到明「china's fraud extends well beyond its wuhan virus coverups」。經過今次，中国嘅大反派形象，徹底確立，深入民心，打風都打唔甩。

敵友分明　中港台要識分

另一邊廂，台灣亦都趁疫情爭取國際好感，效果就好得多。台灣抗疫成績，全世界都認同，將成為國際benchmark。而當中国派人喺全世界搜刮醫療物資，台灣不單止自給自足，仲有剩捐畀自由世界盟友，布拉格市長嗰句最中point：台灣畀嘅係禮物，而中國係賣物資。Ouch！

中国神憎鬼厭，攬炒埋海外華人，俾人歧視。香港人最驚外國人分得唔夠細，當我哋都係中国人。好在，發覺唔少外國人，都因為反送中時代革命，分得出原來Hong Kong is Not China。其實香港人講Cantonese，已經好啲啲，講難分，台灣人都係講Mandarin，仲難分，今次台灣國際地位提升，有望令更多外國人明白，華人樣都要分中国定港台，一邊係敵人，另一邊係盟友，絕對唔可以撈亂。

台灣出手　大打爭氣波

台灣嘅口號Taiwan is helping，係堅做得到。中国幾十年嚟，不斷令台灣喺國際社會被孤立，連WHO都入唔到，結果今次武漢肺炎，台灣打爭氣波，全世界發現，WHO唔侵台灣玩嘅，樣衰嗰個係中国白手套WHO，唔係台灣。台灣呢一疫，奠定自己喺自由世界嘅地位，俾人屈機咁多年，終於會得到國際應有嘅承認。香港高官仲懶醒走出嚟學人講「一個中國」原則，今日台灣絕對可以同世界講唔稀罕爭做中乜國，「我哋係台灣」。

而中国呢一次嘅選擇，睇怕係鎖定咗今後呢個時代嘅路徑，心急想喺國際社會升呢做大佬，最終換嚟俾人social distancing嘅下場，竟然同台灣原本嘅孤立位置迅速互換。中国對上一次同自由世界壁壘分明，係韓戰時代，當時香港仲係大英帝國屬土，有條件含含糊糊咁騎吓牆甚至發大財。今次中国vs自由世界，所謂乜嘢「一国兩制」嘅特殊身份，喺中国不斷搬龍門之後，已經被攬炒咗。一係呢邊，一係嗰邊，左右逢源嘅空間已經消失，決斷時刻正進入倒數。