左丁山識得餐飲酒店界人士，不在少數，呢兩行去年下半年生意轉差，仍可勉強頂得住皮費，點知今年冇示威，殺到埋身嘅係自武漢傳出嚟嘅冠狀病毒，害得全世界旅遊航空酒店餐飲業雞毛鴨血全面崩潰，全球失業人數以百萬計，香港當然難以獨善其身，左丁山自懂事以來，1950年代至今，未曾見過咁壞嘅市面蕭條，本地酒店罕見遊客，時代廣場、海洋中心、圓方、國金二期、希慎中心、太古廣場、置地廣場等等全部靜蠅蠅。市面有名店租約到期棄舖而去，實屬理智商業行為，業主唔肯減租，乃攬炒格。
左丁山呢輪慣咗在圓方停車場泊車，某日忽覺好悶，於是到商場360買些好嘢返屋企食，唔出中環咯，買吓買吓，買咗五百幾蚊，醒起不少商場都有停車優惠，於是行到禮賓枱拍八達通，禮賓枱有位小姐處理，一望張簽費單就話：「可以五小時免費泊車」，點知拍完卡，小姐就話：「原來你係在早上10點前入場，冇優惠，對唔住。」左丁山不知有此規矩，為之撞火：「搵笨咩！」該位小姐真幽默：「下次你買完嘢，過咗10點至駛架車入嚟泊啦！」
氣頂之後，醒起私人銀行家M在ICC返工，打個電話畀佢呻一呻，賓架M話：「係咁㗎嘞，你讀經濟學，應知道甚麼是differential pricing，我地八點就返到銀行，永遠得唔到泊車優惠㗎。要攞優惠呀，就特登在十點鐘駛架車出去，再入番嚟，然後放工時去購物。你唔好勞氣，諗吓就明白遊戲係咁玩！」圓方（後來知道其他商場亦如此）管理公司要食硬樓上返工客，寫字樓人士通常在九點半前已經返齊，停車八、九小時，一於唔畀停車優惠，食硬，冇得走嘅。遊客、消費客通常在10點後先至出動，到商場消費，一般係兩三個鐘頭嘅啫，畀優惠冇所謂。賓架M呢啲醒目仔就識得玩遊戲，但左丁山久唔久先至會即興買嘢，費事煩啦。圓方商場實在好方便，廁所堪稱全港商場最佳，值得一讚，只可惜，無論十點前、下午五點後，左丁山目測人流稀少，名店拍烏蠅，商店交貴租實在難捱！報紙講地產，最近一味用個慘字，其實以香港大局計，租金跌多啲仲好，號稱全球第一貴租（羅素街），對香港全無好處，舖租從高位回落五成至六成，比較有利營商，多啲人搵到啖飯食，業主獨肥，長久會破壞社會穩定。中共以前批鬥黑五類：地富反壞右，以地主排第一位，老毛係好工於心計㗎！
沒有留言:
發佈留言