#狂迷投稿 《#蝙蝠俠》 文：AB
The Batman無疑極力營造罪惡城市的氣氛、企圖炮製一套「偵探片」，但本篇想就專門講情節嘅唔合理，令這所謂偵探片虛有其表，名不副實。
.
1. 謎語人先至係真英雄？謎語人千辛萬苦搵料捉貪官，但主角batman 卻只係捉小偷混混，而且謎語人望落仲後生過batman, 原來佢先至係大英雄仲勁過batman，你batman 仲捉佢做乜？由得佢捉哂貪官已經得啦。我都明，奸角「替天行道」情節比比皆是，但今次主角唔係一般警察，而係神通廣大、有財有勢嘅batman，完全有資源有能力有意願去揭露政府貪腐，但今次描寫佢「阻止罪惡」嘅一幕就係開頭打流氓，比起謎語人嘅「鴻圖大業」相比實在遜斃了。可能編劇都意識到咁樣落去唔係辦法，於是結尾大力一扭，寫謎語人要殺新市長，於是batman打謎語人就「出師有名」了，但變得非常唔合理，因謎語人以往一直有搜證，確認目標涉貪先至郁手，但新市長顯然未經搜證程序，冇做錯事點解又要殺？
.
2. batman 行行企企：成套戲batman 理應需要執行幾個任務：1、捉到謎語人；2、阻止謎語人殺人計劃；3、幫手搵返貓女個朋友；4、救人，5、捉「內奸」。但事實係，佢一直無辦法阻止謎語人，亦都無嘗試救貓女嘅朋友，又唔夠快阻止洪水，謎語人亦都係自己坐響度等警察拉，連新任市長都係自己匿埋一邊，黑幫大佬都要靠貓女朋友偷偷錄音先可以坐實罪名，完全靠batman 自己阻止奸角陰謀嘅成份近乎零，成套戲batman 真正有同惡人正面交手，只係響夜總會同體育館打果班嘍囉。今次所謂要拍成「偵探電影」，但其實batman根本冇破到案，咁嘅偵探如果不是batman光環，其實都幾廢。最大問題係，佢破唔到案，又完全冇覺得失望、自責、憤怒，而係若無其事。咁探長搵佢黎幫手查案，其實係冇用？
.
3. 謎語人如何知道batman 身份？本片batman 之所以與謎語人案有關係，純粹因為謎語人寫卡俾batman, 因為謎語人知道batman 即bruce wayne, 要父債子還，但究竟謎語人係如何得知？基本完全無交待過，又係「不要問只要信」呀？
.
4. 反過來，點解又唔嘗試推測謎語人身份？成套片有趣地方係，聲稱係偵探片，但「偵探」從來冇打算猜測謎語人身份，謎語人開live 亦都冇打算追蹤訊號搵到謎語人居所。現實世界中，的確有單靠行文字跡搵到兇手嘅案件，詳情請睇《Manhunt: Unabomber》。
.
5. 「破案」過程兒嬉：捉黑幫大佬似乎係全片高潮所在，但政府官員同呢位黑幫大佬嘅關係嘅唯二「證據」，原來只係貓女個朋友引述已死嘅市長，加埋果個貪污警察嘅一句說話，喂，你套戲成3個鐘，一d 鋪陳都冇，咁就叫揭露左架喇？咁叫偵探電影呀？
.
6. 其他：堂堂一個警察局長親自走去街頭交易毒品又係駭人聽聞，你想像下蕭澤頤親自去砵蘭街同古惑仔交收丫？仲要企正響街上喎！仲有，謎語人揭露貪污，又識玩social media, 應該成為萬人迷至係，市長喪禮都大好多人示威，照計應該好多支持者，但佢個channel 得500 個followers?!
.
7. 拙劣仿效七宗罪：睇得出套戲想抄七宗罪，但屬於拙劣模仿，唔係成日落雨就叫仿效左，人地鋪陳氣氛、以至幾條屍死法都令人印象深刻，你batman 果三件又唔核突（市長俾人扑穿頭斷手指但身上竟然一滴血都冇），殺警察局長又搞笑，又要搵老鼠咬但又要打毒針，根本多此一舉，用地毯工具殺人又係夾硬，大佬你又冇交待謎語人工作，幾千樣工具你非要揀呢樣去殺人？
.
8. 本片太長：的確可以cut 走1/3，企鵝同貓女作用不大 - 企鵝對劇情唯一貢獻就係俾batman 遇到貓女、以及指導batman 西班牙文，仲要因為batman 估錯西班牙文而白白被打一身。貓女更無聊，愛情線莫名其妙，batman 又唔肯救佢個朋友，二人嘅「功能」基本上可以由batman 或探長自己做返，省去鋪排所需時間，令情節更緊湊。
.
總之，呢套戲係一套偵探片沒錯，但如果剝去batman 光環，就係一套比較爛嘅黑幫偵探片，情節既唔合理，亦冇查案元素，偵探能力好弱，似一個旁觀者，多過一個參與者，想睇batman 破案英姿又冇，想睇動作又冇，想睇batman 同奸角對決又冇，餘下的就係所謂「氣氛」「鏡頭」。
沒有留言:
發佈留言