2022年5月28日
皆因《#壯志凌雲：#獨行俠》好睇到我呆咗，成個星期一隻字都打唔出。睇完套戲，不停思考究竟以前睇嗰啲戲係咩嚟？如果嗰啲叫電影，呢套應該用邊一個10倍有力嘅字眼去形容先唔會眨低佢嘅成就。版友問我影評網站97分有無水份？我話無，可能會俾100分。
.
之前都講過，好老實第一集唔係我杯茶，但我理解當中值得欣賞嘅位，有啲部份獨立去睇係好正。續集有善用到以前受歡迎嘅元素，致敬好懷舊好，老一輩當然將幾十年前嘅青春回憶挖掘出土，後生一代就享受到現代拍法呈現嘅老情懷。聽到主題旋律每次都起雞皮，嗰晚睇完我返到屋企不停哼，簡單嘅19個音哼到訓唔著覺，震撼嘅戰機dogfight加上蕩氣迴腸翱翔天際嘅音樂真係令人精神飽滿。
故事勁在簡單直接，任務連小朋友都聽得明但又俾你覺得係極高難度。諗返成個plot都係老土嘢，但你吹咩，就係將聽落過時嘅劇情拍得好睇過你而家為創新而諗爆頭先建立到嘅複雜世界。睇完有種感覺似《極速傳奇：福特決戰法拉利》，原始，狂野，舊但充滿能量。靚佬湯絕對係最型老屎忽，去到第二集依然無人能夠取代，繼續交唔到棒。就好似劉華，一把年紀戲裡面都係要溝下女，大頭影住，舉手投足係要靚仔。又吹佢唔漲，Tom Cruise用自己去證明佢仲係得，係未老，拍戲次次揾命搏，設計一堆痴線動作盡量自己做。戲中安排獨行俠親身示範高難度任務，説服力來自演員本人，與角色二合為一，學員同觀眾一齊睇到O嘴… 將典範、榜樣定義標準大大提高，做男人做到佢咁抵佢發達。
呢篇嘢幅圖，係想提醒返大家唔該入戲院睇。唔好等Netflix等bt，我亦唔係盲追IMAX嗰啲人，都會建議你盡量以IMAX為首選去感受。唔係一個鐘IMAX畫面，唔係睇多2X%嗰啲宣傳數字，而係我覺得佢堅係識用IMAX拍到佢專屬感覺。太多戲掛個名，但無感，有鬼用咩… 點解路蘭IMAX受追捧，佢識設計啱嘅情節啱嘅運鏡再用IMAX去表達。Top Gun：Maverick呢套戲係你去接觸IMAX嘅一個踏腳石，亦係利用IMAX去得到最佳享受嘅機會，普通戲院帶唔到俾你，屋企部電視更加。
.
#壯志凌雲獨行俠
沒有留言:
發佈留言