20220514
【迪士尼CEO終於承認，唔駛再靠中國票房】
疫情後電影市場勢力從此改寫係不爭事實，但都唔好咁老定，都要適時變化。
2020年首度中國票房超越美國成為世界第一，而2021年都有套《長津湖》破曬紀錄大收58億，似乎中國某程度上係唔駛再靠美國，因此用盡各種理由阻止荷里活片喺美國上映，荒謬到連《蜘蛛俠：不戰無歸》出現自由女神像都唔得。即使舊年最高票房嘅《F9狂野時速》都只得14億、《哥斯拉大戰金剛》得12億，下半年荷里活片幾乎缺席，而喺2022年上映嘅荷里活片，竟然最高果套係《怪獸與鄧不利多的秘密》先得果1.6億。
面對中國收緊荷里活電影最大受害者當然係迪士尼，由《黑寡婦》開始所有Marvel電影都上唔到，即使《奇幻魔法屋》同《尼羅河謀殺案》上到，票房都麻麻，對於佢哋一直咁努力拍打入中國市場戲都失利（《花木蘭》係最好例子），日前迪士尼CEO Bob Chapek終於承認，唔駛再靠中國市場。
《奇異博士2：失控多元宇宙》喺冇中國市場下，全球單單一星期都大收逾5億，有中國票房當然唔止呢條數，但冇咗中國（仲有俄羅斯）都唔差得好遠，迪士尼一樣有賺，Bob Chapek終於發現，冇咗中國市場，放諸全球票房都影響不大。迪士尼雖然會繼續打入中國市場，但唔再係重點。
雖然，有中國票房加持，確係令好多戲票房大收，同時都有太多中美合拍片，為要打入中國市場搞到不倫不類，一堆「景甜B宇宙大電影」，就係最好證明。就算俾你有中國票房，全球票房仆直都無補於事，加上各個串流平台都入唔到中國，與其繼續擦中國鞋，不如好似以前咁，拍啲真正可以暢所欲言嘅電影仲好啦。
最好笑係，呢番言論當然辱華，又惹來中國網民話要杯葛。咁……你本身都（正途）睇唔到，又可以點杯？
當然，我哋唔好笑中國市場被劇透又冇得睇，香港有朝一日跟中國咁禁映絕不出奇，上半年再加埋奧斯卡事件，我哋都已經經歷過，但喺有得睇嘅時候，都可以花生下呢件事嘅。
沒有留言:
發佈留言