20220528
【Tom Cruise真係將生命獻給電影嘅真男人】
二刷《壯志凌雲：獨行俠》4DX，同IMAX一大分別係，個位搖到咁令你覺得好似同佢哋一齊飛到有壓力，而且同你喺主題公園玩一類超動感影院玩足兩個幾鐘咁冇分別——一般4DX片會有空間俾你抖抖，呢套印象中係我自《引力邊緣》後睇過最密集效果嘅4DX片，睇完你會覺得，你都玩得咁累，演果班仲累，而阿「靚佬湯」Tom Cruise成60歲仲同你咁搏，誠意可加。
第二次睇，認真留意下，雖然成班後生演員都堅係自己揸戰機，但戲份最多依然都係Tom Cruise，仲唔止單純講對白，佢角色仲要交埋戲，睇佢七情上面兼面對埋各種壓力（當然我相信實際冇電影情節講到咁誇），你會覺得呢條友唔止係癲，佢對電影果種熱誠同認真，先係真正癲。次次都玩命演出，唔係一次半次，係次次，有幾多人做得到。
成六十歲人都仲要演啲帶點「靚仔小生」角色，唔似同期嘅已經挑戰奧斯卡，甚至挑戰過攞埋獎搵夠退休喇，佢仲要咁搏——或者佢知道自己曾經嘗試過唔得，咁不如做啲荷里活冇人敢做嘅事：特技嚟真自己做。
除咗《壯志凌雲：獨行俠》自己嚟，最出名當然都係《職業特工隊》系列，集集都有特技係冇替身自己嚟，例如：
《職業特工隊2》開場徒手攀岩、電單車生死戰後用真刀「插眼」
《職業特工隊3》上海大樓彈跳、中段橋墩大爆炸真係炸到個人飛起
《職業特工隊：鬼影約章》爬哈里法塔——小弟有畏高，呢場個人覺得係佢最癲特技，佢手套突然冇電果下，當時喺澳洲睇係全場一齊尖叫
《職業特工隊：叛逆帝國》徒手爬上架飛行緊嘅飛機要潛入（點知Benji開錯門
）、一口氣潛六分鐘水
）、一口氣潛六分鐘水《職業特工隊：叛逆之謎》自己揸直昇機玩特技、高空跳傘、跳過兩座大廈搞到撞親腳
《職業特工隊：死亡清算上集》揸電單車飛落懸崖
除咗《職業特工隊》系列，仲有《盜墓迷城》嘅無重墜機、《烈探狙擊》嘅格鬥等等，好似都唔算得係咩喇。
你可以笑佢咁老仲做靚仔小生，但佢喺《雷霆喪星》肯化醜扮秃頭都唔介意，一樣超搶鏡。
最後，佢年逾60會同SpaceX合作，成為第一個真正上太空拍戲嘅演員，你冇睇錯，佢真係上太空拍戲。
今時今日咩都用CG，甚至依家連CG都唔用，直接XR技術喺LED幕前面拍戲，理論上冇咩做唔到，但佢仍堅持咩都「嚟真」，先至可以呈現到啲咁逼真刺激悅目嘅動作場面，同埋種種超震撼鏡頭，係CG都做唔到嘅真實感。睇完好多同類大片或者都會忘記咗，但爬哈里法塔、爬飛機呢啲咁癡線場面，即使你唔記得佢戲內任務點解要咁做，但呢門只此一家玩命特技，正宗睇到你個心離一離，係點都唔會忘記。
可能佢私生活好不堪，信科學教又個人神神化化，感情生活都唔好得去邊，對劇組演員態度亦好跳，但喺銀幕上嘅佢，作為觀眾嘅我，係佩服都支持嘅。
作為一個演員，做到咁多嘢、考到咁多牌、識到咁多技能，仲可以上埋太空，唔係拎到名氣同錢就退隱、年過六十仲咁打拼，喂呢一生都無憾啦。
我成日諗，假如佢當日真係做咗鐵甲奇俠，呢十幾年嚟，我哋仲有冇可能睇到咁多精彩特技？定還是搞到Marvel都要咁癲？
《壯志凌雲：獨行俠》觀後感可看留言連結，Tom Cruise各電影海報購買可點擊圖片連結。
沒有留言:
發佈留言