【《奇異博士2：失控多元宇宙》無劇透短評幾句】
一如以往，如果大家想劇透，請跟以下格式，雖然今次都冇咩好透，唔跟格式劇透者留言會刪走：
**（劇透）**
。
。
。
。
。
（你想留嘅言）
1. 尋日睇完《奇異女俠玩救宇宙》，好多觀眾散場都同我一樣諗法，到底《奇異博士2：失控多元宇宙》有冇可能超越到佢？珠玉在前，《奇異女俠玩救宇宙》唔止各方面都好佢十倍，獨立嚟講呢套都唔多掂。
2. 如果講視覺效果，今集依然唔失禮嘅，穿越多重宇宙嘅視覺奇觀、種種幻象世界，依然係《奇異博士》嘅招牌，呢套甚至覺得如有3D效果會好勁
3. 幾場動作大場面拍得好刺激，Sam Raimi執導吹到係Marvel史上最恐怖血腥作品，吹大咗嘅，但的確夠陰暗詭異，都有Sam Raimi招牌本色，當中有幾幕恐怖場面同Wanda造型直頭睇緊《Evil Dead》咁，呢啲自我致敬彩蛋係正嘅——Elizabeth Olsen繼續演技大爆發。
4. 可能都因為《奇異女俠玩救宇宙》珠玉在前，加埋有套《洛基》，以為佢玩「多元宇宙」會幾癲，點知白白浪費咗成個設定，基本上唔同時空走來走去都冇乜推進過，仲要奇異博士都能力大減
5. 與其話係《奇異博士2》，不如係《溫黛與幻視2》，之但係你劇集已經玩咗一整季，今集呢個概念好似又重覆一次咁，然後還原基本步，多餘咗啲
6. 宣傳冇呃你，預告同一切宣傳見到都只係頭半個鐘，個故事亦都唔係你想像咁去，但，「唔係你想像咁」都會有好或差，佢係向差果方面發展
7. 同樣地，前有《蜘蛛俠：不戰無歸》嘅高度，呢套都的確有「wow moment」，係任何宣傳冇見到嘅，但果個「wow moment」唔似蜘蛛俠三代同堂咁有劇情需要，就真係純粹有個「wow moment」就冇咗，我唔知果個「wow moment」角色仲會唔會再出現，如果就咁完咗除咗爽就有啲無謂
8. 可能有人會覺得好有創意，但突然音樂對決我係大問號咗嘅。
9. Marvel劇集化個更重要問題係，如果套套一個故事存在意義只為解釋上一集、上一季未完嘅事，然後又冇解釋啲咩落下一集，初睇係ok嘅，長此下去都咁唔完整就真係有問題。如果觀眾冇睇過《溫黛與幻視》，知唔知佢做緊乜？
10. 另一大問題係，你鋪個新人出嚟，又可以突然出現，仲要有好重要位置，然後你又唔多啲交代佢，相信好快又有個人劇集啦？
後記：《阿凡達：水之道》個預告好藍好藍，重點好似好耐冇睇過3D喇
《奇異博士2：失控多元宇宙》、《溫黛與幻視》、《奇異女俠玩救宇宙》觀後感全文可看留言連結。
沒有留言:
發佈留言