長沙灣唯一包伙食生意跌四成 80後老闆領十個老夥計逆市謀生不裁員
80後老闆羅家俊（右二）帶領十個老夥計，堅持營運這個夕陽行業，是日終於做到停手，可以食件cake鬆一鬆。
送飯是每日最繁忙的時候，連大廚都要幫手送飯，基本上是全員出動。
有37年歷史的長沙灣熟食市場去年關閉，場內原本有四間做包伙食的檔口，只餘下一間繼續經營，是現時該區碩果僅存的包伙食。受疫情影響，生意跌四成，但這個80後老闆帶領十個老夥計，繼續營運這個夕陽行業。「我相信捱過呢兩三個月都會變好，點解要夥計自己一個捱？我哋做僱主都要有做僱主嘅良心。」合興廚房老闆羅家俊說。
合興在長沙灣熟食市場已有逾30年歷史，由羅家俊爺爺創辦，當初是大牌檔，兼營包伙食，由於去年市場關閉，大部份老闆退休，只有羅家俊決定搬往同區舖位繼續經營。「熟食市場租金好平，加上外面難搵舖，就算搵到皮費都起碼要加幾倍，特別難做，但由於其他檔唔做，可以接收佢哋嘅包伙食生意，所以打算博一鋪。」羅家俊請了10個夥計，當中6個由同場檔口跟他轉到新舖，最年長的是今年73歲的葉長，其餘大部份都是65歲以上。「唔好睇佢已經70幾歲，佢好有責任心，係好員工。雖然佢哋年紀大，但唔會輸蝕畀年輕人。」
五十年夥計「都是喜歡做這行」
包伙食很早便要開始運作，雖然疫情影響生意，但現在每日都要應付至少一千人的份量。每朝6時，羅家俊會獨自到魚欄、菜欄買食材，再運返舖頭給老夥計處理。洗洗切切，差不多11時便要預準時間開爐。「如果太早開爐，菜會凍，雖然有時運到過去嘅餸菜溫度都會打折扣，惟有賣得平少少，至少比一般外賣有競爭力。」羅家俊說。一般菜式會包飯包湯，有時難計算每個人的白飯份量，便索性送上一整個飯煲的飯。炒起菜，就會按單按人數上碟，柯打全寫在紙上，除了避免漏單，還很窩心地加上注意事項，「有啲客指明唔食魚、有啲唔食牛肉，所以我啲要分清楚，唔可以搞錯。雖然餸菜冇得揀，但可指明有乜唔食。」年資約10年的員工三家姐說。送飯是每日最繁忙的時候，連大廚都要出動，基本上是全員送飯，每個人負責一條路線，「一次過送五、六間，按指定時間放喺門口。」
「我哋算係第一代外賣仔，公司食飯時間好趕，有時會逼埋一齊，一上一落起碼要6分鐘，有啲公司又唔鍾意你太早送到，所以預時間要剛剛好。」葉長形容得相當緊張，令我腦海湧現「刻不容緩分秒必爭」幾隻字。記者跟他兩日，送飯的路線、時間差別不大，推着起碼50磅重的飯餸，手腳靈活得不像70多歲。「我好少病，又唔食煙、唔飲酒，身體都算唔錯，否則好難應付……仔女有叫我退休，我都打算做多幾年，好過日日喺屋企發呆。」送飯後，他會坐在馬路邊吃飯盒，每日如是。「食完要等餐具回收，費事走來走去，約莫等四個字（20分鐘），我食飽，客人都食完。」
葉長20歲入行做包伙食，亦曾自己開舖包伙食，但因為行規是事後找數，短至一星期，最長一個月，有公司執笠令生意周轉不來，他最終忍痛結束生意，寧願去打工。「這行長遠來講係穩定嘅，做呢行兩餐一定無憂，所以我都鍾意做呢行。以前包伙食好犀利，唔似得而家咁少，用大架車叠到山咁高，一車已經有數十圍，一座大廈都有幾十圍，以前全部都係搭食。」
五十年代打工仔人工不高，通常老闆請個廚師煮飯一起吃，提供包吃包住福利。六七十年代經濟起飛，工業發達，為一班不方便出街吃飯的行頭而設的包伙食應運而生。食物在工場煮好再送去，分開一圍圍「搭食」。包伙食員工最初用頭頂着托盤送貨，後來改用擔挑送食物，輾轉才轉用手推車，一圍有湯有飯有不同餸，不過就不能揀餸。到了八九十年代製造業北移，令包伙食漸變夕陽行業，但不變的仍會用瓦碟銻蓋冚着餸，用花布紮緊一圍圍餸菜，食具回收洗淨再用，算是當時的環保先驅。
夕陽行業老闆「想和夥計做落去」
在這個行業，羅家俊可能是最年輕的老闆，寡言的他，多由得老夥計自動波做事。「他對夥計唔會鬧，你鍾意食乜就買埋你食，你肯做就得，你見佢唔出聲，但其實都係全靠佢帶住我哋呢班老夥計，如果冇佢，我哋個個都要退休。」葉長說。三家姐跟了羅家俊十多年，她說：「大家都幾十歲，外面邊有人請你。而家環境唔好，唔使咁多人返工，就話不如我唔好返喇。佢仲話頂得住，要死一齊死……佢呢度好，好可愛，成班夥計都為他博命，好似一家人咁。」
羅家俊一星期返足七日，當初他亦想過不繼承這門生意。「我以前做過運輸，原本想出外闖吓，認識豬朋狗友多，跟大佬、嫖賭飲蕩吹乜都齊，我阿爺退休叫我返來，我諗都冇諗就返來。都玩夠喇，嗰時廿歲頭乜都玩夠。」接手爺爺生意，媽媽最反對。「佢17歲讀完書，我已經叫佢唔好做呢行，佢話喺出面俾人蝦，十幾廿歲出來做嘢唔會好醒，俾人話幾句就怯，佢要返來做，我都冇辦法。而家做咗十幾年，入呢行有乜出色，又賺唔到錢，似個乞兒，周圍送飯畀人食唔係乞兒咩？一個菜35蚊，又要送飯又要送湯，又要畀碗筷，一陣又要收返來洗……」
「好在老夥計好博命做，佢係個定心丸。如果我個仔唔做，我一定都走咗去，我而家都是幫佢。算係累到我呀，但我唔想睇住佢咁捱落去。」羅媽媽感慨萬分。家俊搖一搖頭說：「呢個行業一定有佢嘅生存價值，仲會有佢嘅市場，雖然唔似得以前咁闊。如果仍然負擔到，都想同老夥計一齊做落去。」
記者、插畫：何嘉茵
攝影：張志孟、周芝瑩、潘志恆
剪接、美術：呂皓怡
