22年租金有減冇加 越南粉小店老闆：呢種業主好難搵！(蘋果日報)

22年租金有減冇加 越南粉小店老闆：呢種業主好難搵！(蘋果日報)

四寶粉，牛骨不算太濃味，但不肥膩，可選擇辣度及酸度。$34冷盤包括坊間少見的腍肉（經特別醃製的豬肉），質感似香腸帶鹹香，很開胃。$36倪漢強樣子有幾分似薯片叔叔，以自己的越南粉為榮。太太負責包春卷、咖喱角，絕不假手於人。$37柴菜牛骨湯，最能食到湯底的原味。$8倪老闆本身對味精敏感，堅持不加味精。

「我和熟客講，我呢度租7,000蚊，業主廿年無加我租，佢哋話而家好難再搵到呢種業主。我話係啊！而家真係好難搵！」樣子有幾分似薯片叔叔的金來越南粉老闆倪漢強說。1995年，他將舖頭遷入葵涌光輝圍，月租9,000元，兩年後九七金融風暴，業主減租2,000元，廿年來每月只交7,000元，兩人非親非故，卻擁有一段難能可貴的情誼。

其時搬舖全因舊業主加租，1991年倪漢強用上大部份積蓄在深水埗開舖，店內只有八人座位，累積了一班熟客，四年後，業主竟加雙倍租。他不屈服，決心遷走，在報紙上見到招租廣告，便選擇到葵涌光輝圍延續引以為傲的越南粉，更廿年來每月只交7,000元，「業主話最緊要我哋搵到餐飯食，搵唔到，加租都無用！我呢個租客無乜事都唔會煩佢，鐵閘壞咗，自己搞到都自己搞，每個月一定準時交租，一毫子租都不會欠！」倪漢強說。他的越南粉在葵涌一個簡陋商場內，裝潢陳舊，人迹罕見，卻是一間很特別的舖。牆上貼滿老闆手寫的餐牌，字體不算美觀，卻很有風格，一目了然。

一到門口，已聞到香濃牛湯味。「喺我未租之前，呢度一年已換了四個老闆，但我一來便廿多年了。這裏偏僻，得熟客先會識嚟幫襯，如果不真材實料，邊有得做，每次用約十斤牛骨煲湯，要熬通宵，好彩我夠猛火，我主力做越南河，如果唔做得好，點樣做到生意！」他邊熬湯邊說。雖然舖位置偏僻，但隔籬賣粉麵、同樣尺寸的舖位已經要兩萬多元，他月租7,000元實低於市價。「我根本同業主唔識，都係睇報紙頂番嚟，見面都無五次，可能見大家投契。佢數年前過咗身，將業權轉咗俾個女，不過一切照舊，接手十年都無加租。好多業主見到你有客就加租，搶錢啊！無諗過做餐廳嘅開支有幾大，就算老業主唔交租，接手嘅下一代都會加，好多都唔會有情講，所以呢個業主可以話去邊度搵啊！我係好運啊！」廿多年來，他只試過因身體不舒服，遲交過一次租，笑說：「我默默交租，他默默收租。」

只賣一款湯底　堅持不加味精
倪老闆賣的越南河只有一款湯底，但每個熟客都懂得自行調配酸和辣度。他本身對味精敏感，堅持不加味精。「我出去食飯，經常食到個頭爆炸，隨時帶定包必理痛，後來先知係味精敏感，而家都好少出去食，驚都驚咗。」店還提供坊間少見的腍肉（經特別醃製的豬肉），來貨價越來越貴，每磅要200元，經常斷貨，質感似香腸帶鹹香，十分開胃。「好多越南餐廳連樓面都唔識咩叫腍肉，我有諗過唔賣，但我開檔開了廿多年，客人吃慣咗，都係一種情意結。」小店只有兩夫婦做，倪老闆主理麵檔，太太則負責包春卷、咖喱角，煲豆漿、菊花茶，不假手於人，去年只休息了三日。「我97至07年未加過價，差不多十年了，但呢幾年物價太貴，先無辦法，一年加一元，都知道打工仔好難捱，所以都唔敢加得多。」他續說，「我根本無任何壓力，仔大女大，租平，唔使經常諗呢個無錢交、那個唔夠錢交，我都希望做得幾耐得幾耐。」

金來越南粉
葵興葵涌道1001號德昌大廈地面商場

記者：何嘉茵
攝影：伍慶泉