港棄坡取 千頌C

 

千頌C

20220919

由香港渣馬取消，到今朝見到雜紙回收廠被逼遷單新聞之後，越諗就越嬲。香港大把人有能力、有魄力，但問題因為一啲冇章法嘅政策／管理，令香港不斷俾人㩒住打。依家好明顯港棄坡取，摑完一巴又一巴，作為香港人，其實真係唔太好受。

咁講返渣馬，田總9月16日公佈取消渣馬，然後一堆政府消息人士就走出嚟話「吓？點解嘅？我諗住批架啦，做咩唔等多兩日。」搞笑！好啦，咁其實另有消息人士講我知內情，成件事根本就唔係田總問題。以下我將綜合各傳媒引述嘅政府消息，俾大家睇睇事件更多面貌。

政府消息：田總喺9月7號先向政府提出申請，如果時間咁緊迫，你做乜要一星期前先申請？

事實係6月已交咗申請，中間根據當局防疫要求，revise過四次！係四次！但每次都無開過綠燈，無示意過可舉行嘅機會率，一味無限輪迴revise又revise。政府話官員好shock，一係working level 冇交份prosposal上去，官員真係shock；一係就有人扮shock。

政府消息：從來未聽過田總有設下日期「死線」，今次「突然申請又突然取消」，好兒戲囉。上年都係兩個月內搞啦，今年11月20先跑，兩個月前即係9月20囉，做咩唔等多幾日呀？

搞笑嘅，田總喺9月8日開過記者會，公布賽事擬11月20日舉行，仲表明要求政府一周後回覆，即係9月15日，呢個唔係死線係咩？11月中要開跑，咁大型嘅event兩個月前搞都已經好趕，仲要連可以幾多人跑都唔知，點plan路線？點plan流程？點解上年兩個月內搞到，係因為開跑前4個月已經知人數。渣馬國際賽事真係唔可以兒戲架，太趕嘅話，點搞？

政府消息：田總有問過2月份有冇合適日子，之後政府方面都回覆田總，用做終點嘅維園2月有空檔，點解唔考慮延期？

政府遲遲唔批11月賽期，咁田總就主動問，維園11月打後仲有冇期，但當時政府就話要數到2月中維園先有期。不過有期都唔代表俾田總搞，亦即係話冇開綠燈。再者，明明上年年尾已公佈「2022馬拉松」賽期係11月20日，如果11月、12月都搞唔到要延到出年，咁「2022馬拉松」點都要取消啦，出年係2023啦！

總結就係，政府方面拖咗人好耐，又唔講批唔批，人哋因為唔想hea搞就放棄。田總仲要俾政府消息人士話「係咪田總本身無信心在疫情下籌備咋」、「係咪驚太少人報名參賽，主辦單位隨時要倒貼回唔到本咋」。其實田總為咗搞渣馬，都落咗唔少功夫，折騰咗大半年，搞唔到，你話邊個傷心啲？

即係有個男人求婚，個女嘅次次都話「你改咗呢個缺點再算啦」好啦，缺點就改晒，婚求極都reject，個男人30歲求婚求到50歲放棄之後，個女人講「你早兩日先求婚，做咩唔等我答？我諗住應承你，你唔好走啦。」「好啦！你走啦！你根本就係無自信，你廢呀！」呢個情況，我諗冇人會同情個女人，仲會祝福個男人「You deserve a better one」

國際賽取消，政府話：我唔明點解佢要取消。
金融科技周港星對撼，冇提改善方案之下，政府話：唔怕！要有信心！
郵輪泊唔返香港要留新加坡，政府話：我哋仲諗緊。
香港唯一一間紙包飲品包裝回收廠被逼遷，政府話：我都唔知，等我了解吓先！