話執又唔執 老店執笠歸咎市民「唔珍惜」？沾史人類觀察

 

沾史人類觀察

20220929

話執又唔執 老店執笠歸咎市民「唔珍惜」？

九龍城豪華餅店鬧劇，戲劇性地以「唔執啦」告終。之前好多人排隊時，店內阿姐抱怨：「平時又無人排隊，話執先有人排隊好似送殯咁。」我好不以為然，豪華餅店雖然係老字號，但啲麵包水準只屬普通，唔好話同全香港比，同區內麵包店比都唔算好出色。除咗執笠令市民想送別，邊有可能日日都會有人排隊。只係念在你四十幾年老店，市民先想嚟排隊食多次。係送殯架啦，但有畀足帛金唔係嚟白食你餐解穢。

咩平日唔珍惜之說真係痴線。普通街坊麵包店，點日日嚟食？說穿了係啲出品平庸，啲嘢特別好食咪自然有人排隊囉。雖然由細到大住東九龍區，見豪華執笠都覺得有啲可惜（當年豪華隔離仲有個舊式百貨公司叫國際，但一早執咗，都有啲童年回憶喺嗰度），但見阿姐呢番言論就覺得快啲執囉。

你話排隊客人係嚟送殯，平日唔珍惜，但喺我眼中呢啲係唔感恩嘅情緒勒索，十分反感。而家好啦，唔使執啦，但我都係唔會再食。九龍食本身已經多嘢食，行遠少少土瓜環仲多好多麵包店，睬你都傻。

另外見有啲傻佬急不及待出嚟笑啲排隊市民，話人「炒車」。但無人有水晶球預知未來，有咩炒唔炒車，咁驚炒車建議你日日咩都唔好做留喺屋企瞓，咁就一定無嘢炒車。