車公連續兩年示警 - 左丁山

車公連續兩年示警 - 左丁山



車公好像喜歡與特區政府開玩笑，或者是當頭棒喝示警，去年己亥年初二（2019年2月6日）鄉議局主席劉業強按慣例到車公廟求籤，求得第86號中籤，籤文曰：「石田為業喜非常，畫餅將來未見香；怎曉田耕耘不得，那知餅食不充腸。」

當時鄉議局的解籤師傅對傳媒表示，「石田為業喜非常」相當不錯，需要市民政府合作。場外一位解籤師傅陳天恩則說該籤含義實為下籤，「石田」、「畫餅」顯示香港未來（豬年）環境負面：「石頭田點會種得出嘢，畫出嚟嘅餅又點可以食？」復指林鄭生肖屬雞，豬年處於三煞位，預計會為香港帶來一定衝擊。

受聘解籤師傅不敢講的話，第三者則直言不諱靈過鬼，林鄭果然夾硬在石頭田搵米（佢嘅米就係民意支持），無端端在2019年2月14日至3月4日，就提出逃犯條例修訂案諮詢，3月29日公佈法案，4月3日提交立法會首讀，卒之搞出大頭佛，禍延至今。去年2月14日就搞逃犯條例諮詢，點知車公在2月6日已向大家示警：「怎曉田耕耘不得，那知餅食不充腸」，現在當然已知林鄭叫李家超搞修例，其實就係畫餅而已，唔怪得要由林鄭親口講「壽終正寢」，陳天恩話佢處於三煞位，準到貼地。

今年1月26日年初二，劉業強又到車公廟求籤，求到92號中籤：「人生何在逞英豪，天理人情只要公；天眼恢恢疏不漏，定然作福福來縱。」不少朋友知道後，哈哈大笑；林鄭號稱好打得，成日講考試次次第一，直情係「人生何在逞英豪」啦，香港名人除咗林鄭之外，還有那一位「人生何在逞英豪」？唔會係田大少啩？難道是梁振英或葉劉？在位當權嘅先至有資格逞英豪嘅啫！然後第二句「天理人情只要公」，正是一字記之曰「公」，做事不公，堅決不肯成立獨立調查委員會（雖則有七成幾民意支持），公平公正地調查整個反修例事件，何來公道？車公叫特區政府注意天道人情，林鄭會唔會話我係天主教徒，懶理車公。唔理呀？第三句仲攞命：「天眼恢恢疏不漏」，始終係善有善報，惡有惡報呀，如有不報，時辰未到！車公去年示警，有人藐視之，今年車公講明天理循環，仍然有人詐聽唔明？建制派大將石禮謙議員雖然唔係華裔，但對八字算命睇相求籤呢種本土文化，可能係立法會內知得最多最精嘅，林鄭政府高官如果唔識車公，不妨向石議員求教，免害眾生。