【到底《鬼才之道》可以有幾好睇？】晞。觀影記事

 

晞。觀影記事

20240816· 

【到底《鬼才之道》可以有幾好睇？】

#到底可以有幾好睇系列

1. 一晚可以有兩套戲入到呢個系列好似第一次！真心台灣讚到上天花板地步，都驚會唔會太誇（台灣有時捧得太勁有機會少伏），點知玩得好正！

2. 呢套絕對係超應節嘅鬼片，都有大量猛鬼出爐，同時都將個鬼界拍到咁好笑，顛覆盡類型電影仲惡搞埋鬼片套路，可以將類型電影咁反轉拍，亦得到所需效果，對上一套可能要數《屍殺片場》

3. 將傳統鬼片擴展到個咁嘅世界觀已經好勁，仲可以自圓其說到，以為《玩轉極樂園》咁催淚，點知以此自嘲，大量笑料設計喺呢個框架內唔會太誇張，而你又真係笑得出！諗到傳統鬼片，呢類情節背後點出現、近乎「製作花絮」呈現，中段已經笑到停唔到

4. 睇鬼片睇得多，去到最後「最強對最強」對決堅會佩服創作人嘅創意，即時將一類貞子VS伽椰子比下去，將壓軸場「恐怖」場面咁樣呈現，笑到拍爛手掌，仲可以將前面伏線連貫、惡搞埋綜藝節目，咁都俾佢諗到！

5. 呢個組合睇落九唔搭八，又因為九唔搭八有驚喜火花，冇諗過張榕容可以演到咁放；同期睇完《還錢》再睇呢套，覺得陳柏霖gag爆喜劇感已經甩唔到，片尾唔好走，未到最後一秒都唔好走，都係個笑到拍掌位

6. 雖然係套笑片，但拍恐怖血腥位絕對夠認真，搞笑之外如果用恐怖角度去睇，構想係詭異嘅

7. 諗起《屍殺片場》原因都係背後點題雷同，諷刺盡演藝圈奮鬥史，一個人無論幾努力，都唔一定會有人睇到，哪怕係發光發亮一刻都未必有人知，但既然要做一件事，就要認真做好佢，結局果場戲熱血感動，都同《屍殺片場》遙遙呼應

8. 搞笑背後包裝刻劃幾位主角過去嘅感情，無論係廢青嘅親情、癡心女嘅怨恨、懷才不遇歌手嘅遺憾；人生幾努力都冇人睇到，最少努力過亦對得住自己、失意都有班朋友扶持已經冇枉過

9. 以呢個故事嘅創意，相信隨時會俾人買去翻拍，片中都市傳說同獨有恐怖氛圍，可以話係台灣獨家，好鍾意佢搞笑之餘都有好濃厚本土情

10. 最後一個位我要留俾王淨B。有王淨B，做乜都好睇

Bonus: 最近嘅post其實engagement多咗，用心做大家睇到，我係開心嘅，睇呢套另類追夢故事都有唔少位中到，但大家支持還支持，仲有冇人可以行多一步，親身支持到？有幾位朋友都叫我分享會不如定期搞，但加埋follower成五萬人，實際會人數20人都冇，你哋係仲未報名定嚟唔到？下星期就係喇，落行曬廣告揼一大舊錢落廣告都唔掂... 仲未報名快啲去留言連結報名啦！