<<烏溪沙度假營靈異事件>
烏溪沙xxxx度假營，前身為孤兒院，上世紀七十年代改建成全港最大嘅度假營地
讀者 Alan wawaha 二十多年前喺呢個度假營嘅親身靈異經歷。“當年暑假我地學校入去烏溪沙宿營，第一次有咁多同學仔一齊過夜，諗喺都超興奮，不過，嗰次我差啲死乸咗。。。”
話說去到嘅第一晚，大家都有啲攰，再加上人生路不熟，所以到咗瞓覺時間之後都留返喺房度無出去玩。我地十二個中二男仔，屈喺間屋度分六張轆架床嚟瞓，我係瞓窗邊嘅下格床，都算幾亁凈嘅，不過。。。
咁一班低能仔，無網上，無手機玩，又唔想咁早瞓，於是有人就提議玩碟仙啦，始終去宿營玩碟仙，就好似牛歡喜炒咸酸菜咁係定律嚟㗎嘛
我地唔知喺邊度搵咗張舊報紙出嚟，然後又搵咗隻杯碟，但問題嚟啦，點樣去標示隻碟指緊邊個字呢？於是有個平時好嗅串好黐線嘅同學仔，我就叫佢做『黐線仔』啦，佢話不如用佢啲血啦。 就喺我哋笑緊佢究竟點整啲血出嚟嘅時候，佢一嘢就抆走自己手指甲旁嘅倒刺，然後就將嗰一滴血搽咗上隻碟度做標記！(佢嗰時堅癲㗎)
我哋圍埋喺中間，熄剩一盞燈 ，一切終於準備好可以開始玩啦，我同黐線仔同另外四個人伸手指去掂隻碟，其他人就圍喺外面睇，由於間房都大嘅，所以喺外圍嘅同學嘅身後已經係一片漆黑！
初頭，玩嘅過程都無乜嘢， 隻碟一係唔喐， 一係就指去啲無乜意思嘅地方，正當大家都開始覺得有啲悶嘅時候， 其中一個係外圍嘅同學仔話見到窗外有『人』行嚟行去！於是有人就話， 係唔係㗎？不如搵人過去窗度睇下啦
咁我哋喺中間嘅人又唔郁得， 唯有等外圍嗰六個同學仔驚驚青青咁慢慢走過去窗邊睇下啦。 就喺佢哋幾個圍住個窗喺度四圍望嘅時候，突然間，廁所傳出沖水嘅聲！大家第一刻先係靜咗一靜，你眼望我眼，心裡面大家都喺度數緊人頭。 過咗幾秒之後， 大家數完都知道廁所唔應該有人啦，於是其中一個本來玩緊碟仙嘅人， 突然間縮手並且跑去燈制個位開返晒啲燈
我同其他幾個人都自然地跟住縮手，有人立即跑去閂埋道廁所門，有人就即刻跑去開電視， 就得返嗰個滴血嘅黐線仔仲係掂住隻碟無縮手，然後佢好大聲咁鬧我地咁都好驚㗎，鄉郊啲廁所成日都有啲奇怪聲㗎啦！然後佢自己就走去開返廁所道門，而我地就跟住佢後面入去廁所。。。的確，嗰刻又真係乜嘢都無
到瞓覺嘅時候，我成晚都喺度輾轉反側，瞓下醒下咁， 成晚硬係覺得「有人」喺我張床側邊嗰個窗行嚟行去，而個廁所又好似成晚都有人用咁
好唔容易終於捱到第二日啦，喺飯堂食 lunch嘅時候，驚聞尋晚隔離班嘅男仔出咗海邊探險，但喺中途有人見鬼而折返。個重點係，我地班嘅女仔喺尋晚竟然跟埋佢地出去！ 我哋嗰刻嘅感覺好難形容，就好似自己個老婆跟王力宏上酒店傾劇本咁樣
到咗夜晚，我同黐線仔為咗唔想自己班啲女又跟咗人哋去探險，所以我哋決定自己去海邊靈探！ 等到半夜過晒瞓覺時間啦，我地房嘅四個人，包括黐線仔，同埋同班嘅三個囡囡，約埋喺教堂嗰邊集合，感覺有啲似出去偷情
會合後，我哋由囡囡帶路，靜靜雞咁行返去尋晚佢地宣稱有人撞鬼嘅地方。行咗大概十分鐘，我哋行到去通往海邊嘅一條樓梯，佢地話尋晚有個女人坐咗喺樓梯度，不過我地除咗見到好黑之外就乜都見唔到
我哋再沿住樓梯行到落碎石灘度，低低能能咁掟下石仔吹下水，大既兩點左右就打算返宿舍啦
我哋原本諗住行返落嚟嗰時嗰條樓梯走嘅，但係唔知點解，我哋搵極都搵唔返條嗰樓梯，而嗰度又好黑，又勁多樹勁多草， 而且開始感覺到好似有人喺黑暗裡面望住我哋咁，而我地七個人先得一支電筒仔，所以搵下搵下， 我哋就開始越嚟越淆底啦
最後，我地決定沿住海邊嘅石灘再搵第二條路返宿舍， 不過由於我哋得一支電筒，個石灘又好黑，得一條好窄嘅路 沿住岸邊走，所以我地就一個跟住一個行，而我就係負責帶頭嗰個
我記得我一直喺漆黑裡面行咗好耐，條路行嚟行去都差唔多樣， 而且行下行下，包括海浪聲同其他同學仔嘅聲音都越嚟越細聲。。。
突然間，喺我身後有人細細聲咁叫我全名，我本來想擰轉身，但又諗起曾經有人同我講過， 如果半夜三更行夜路時有人叫你全名，千祈唔好擰轉頭同千祈唔好應佢！
於是我扮聽唔到，繼續行，不過過咗一陣，後面嗰把聲又再大聲一啲咁叫我全名，我嗰時開始越嚟越驚，行得越嚟越快，而後面嗰把聲音就越嚟越大聲咁叫我全名！
喺電光火石之間，有「人」好大力咁拍我膊頭，我下意識用力咁鬆開咗佢隻手，然後，『啪』一聲！我比「人」好大力咁打咗一巴。 喺嗰一刻， 我眼前突然間見到黐線仔面對面好凶惡咁望住我，佢一隻手捉住我膊頭， 另一隻手已經喺空中，準備車我第二巴！
我覺得佢係鬼上身囉， 於是好大聲咁叫「救命呀！」，但係發覺身邊就只有佢一個人
「醒呀仆街！」黐線仔一邊大叫一邊打咗我第二巴，然後，我開始感覺到全身都好冰凍， 於是我耷低頭望一望。。。發覺原來自己正身處海中，水已經浸到去心口位！
黐線仔喺呢個時候立即捉住我隻手，出力咁拉返我上岸邊，並且見到另外嗰五個同學仔都喺石灘上面好緊張咁望住我。 後來佢哋同我講返， 頭先行下行下， 我行得越嚟越快，佢哋喺後面係咁叫我，但我都好似聽唔到咁， 然後我就開始行出石灘，再行落海，喺情急之下佢哋開始叫我全名，但係我都冇理到，直到黐線仔衝落海然後兜巴星咗我兩嘢。。。
我哋返上岸之後， 好快就搵到樓梯返上去營地， 而我就開始發燒，好彩病咗兩個星期之後就冇乜事，至於痴線仔呢？ 佢一直都相安無事，畢業之後去咗考消防，由黐線仔變咗做勇敢仔啦。事隔二十幾年後，佢依然係我最好嘅朋友，兼且係我個仔嘅契爺㖭！
沒有留言:
發佈留言