西營盤變身貓奴朝聖地 街坊認貓唔認人 （蘋果日報）

西營盤變身貓奴朝聖地 街坊認貓唔認人 （蘋果日報）



西營盤是典型老區，皇后大道西一帶的唐樓都是海味乾貨店，是老鼠的開餐勝地，店主為求自保，紛紛養貓滅鼠，造就每店一貓的佳景。店舖貓由最初捉老鼠的工具，慢慢成為店主的至愛，走在西營盤，各家店舖貓尤如皇帝出巡般穿梭大街，惹來貓奴聚集該區玩貓和拍攝，不少小貓更成為地主之王。

葉老闆開店16年，養貓已逾10年，店內的兩隻貓一肥一瘦，人稱肥仔和奀妹，是鎂光燈下的焦點，採訪期間，大量粉絲駐守店外、高舉相機。「西營盤多海味店，有九成舖頭都養貓，養嚟捉老鼠，肥仔捉完就會畀我睇，領功」，葉老闆提起小貓便一臉甜笑，當初視為最好的工具，已演變為最好的伴，「玩開有感情，人同動物都有感情，佢又得意」。

葉老闆笑言，肥仔才是店中大老闆，客人和街坊只認識肥仔，不認識老闆，「佢先係主人，日日服侍佢，唔使做，有得食；我哋忙時，佢哋巡街、坐喺出面，佢哋先係老闆」。店舖太子女說，一到農曆新年，肥仔會收到利是，「佢新年有利是逗，街坊畀佢買貓糧，我都未有利是，無計，佢太出名」。兩隻小貓是西營盤巨星，「日日都好多人圍著佢、影佢，有人結婚都返嚟抱著肥仔做伴郎」，小貓可愛又淘氣，兩隻貓跑去捉鄰居養的小鳥，又去偷人家的乾瑤柱食，可說是街坊間的開心果。

唐老闆經營海味店37年，一直以來都有養貓，當中阿旺已成為「店長」達12年，「佢叫阿旺，真係好旺我，旺丁旺財嘅旺；又捉老鼠，又招客入嚟，又同佢哋玩，咁咪旺到我囉」，她笑言養黑貓，因為殺氣大，毫不忌諱黑貓不祥的傳說。「呢度間間舖頭都有貓，同啲人玩，個個嚟幫佢影相，但又走去偷乾瑤柱食」。貓是性格巨星，阿旺被人鬧，離家出走7天，「當初只係捉老鼠，但養得耐有感情，一次返嚟唔見咗佢，我畀3000都要揾佢返嚟」，成功尋貓，可見西營盤的鄰里關係和睦。

記者 梁佩珊

葉老闆視肥仔（地下）與奀妹（車上）為最好的店伴，每天弄貓為樂。 李家皓攝	李家皓攝	葉老闆與太子女葉小姐笑言兩隻店舖貓才是主子，主子面前，人類只是奴才。 李家皓攝
唐老闆。 李家皓攝	阿旺已成為「店長」達12年。 李家皓攝	店主與小貓動作一致，Marcel Heijnen指最愛捕捉這種「貓唱人隨」的畫面。 Marcel Heijnen提供
小貓的動作儼如被斬，可見攝影師的幽默感。 Marcel Heijnen提供	小貓亦有保護色，藏於同色系的乾貨中，只餘下左搖右擺的尾巴。