國際邁阿密同Tatler份約千頌C

 

千頌C

20240205

1：國際邁阿密同Tatler份約，寫到明美斯「除非受傷，均會上場作賽」，你主辦作為簽約方，份約寫到有大大大個空位俾人入你龍門，係咪搞笑？

講緊一門過億嘅生意，事先冇律師睇過？冇plan B如果人哋sick leave會點？定係一開初只係諗住「拎美斯做宣傳賣咗飛先算啦，最後人哋傷咗我都冇計架。」

2：然後依家出嚟份聲明，唔好話「致歉」，連「sor9ly lor」嘅意思都冇，記者問答環節都冇。而聲明最後最後一句，就係講「我唔要你政府個『M 品牌』基金啦，1600萬我唔要啦。」話「決定正式撤回申請」。政府尋日已經講想扣你1600萬元，即係點呢？「依家唔係你飛我，係我飛你。」

3：今次盛事變騙局，其中一樣要留意係個「M品牌制度」。呢個制度，2004年已經有，可以理解為政府endorse咗嘅大型體育活動，同時政府又會為活動提供唔同形式嘅資助，包括錢。咁M品牌上年4月放寬申請資格，除咗一貫有嘅體育總會外，其他私人或非政府機構舉辦嘅活動，都可以申請。

咁回吓帶，第一個私營機構申請到「M」品牌嘅活動，就係登登登櫈，上年11月個國際汽聯（FIA）世界場地越野車錦標賽（World RX），記唔記得咩事？當時大家滿心歡喜睇賽車，結果主辦話「賽道工程延誤」，整唔切呀，所以縮賽程、縮賽道，而當時呢個活動，就係拎咗「M」品牌計劃揼水1500萬。

上年楊局長已經話會keep住檢視計劃放寬後嘅成效，我就唔知會點檢視啦，但兩鑊都出事，睇怕之後成功申請呢個計劃嘅機構，未來都一定會更加俾人望到實。