【 改編更要花心思 ── 《社內相親》與「本土化」這回事 】游大東影視筆記

 

游大東影視筆記

20231208

【 改編更要花心思 ── 《社內相親》與「本土化」這回事 】

_
天氣終於轉涼，有時甚至覺得有點凍，除了是食熱辣辣煲仔飯的好時節，亦是冚住被暖笠笠煲劇的good timing。
_
煲甚麼劇好？最近選擇真心多，無論是電視台還是串流平台，都有不少好作品值得一睇，但作為部份網民眼中的「ViuTV打手」── 講笑，你真係信？奈何一早已被扣帽子，再三解釋也是多餘 ── 不能不提在網絡熱度頗高、由MIRROR兩大「男神」盧瀚霆（Anson Lo）和呂爵安（Edan）擔正、陳漢娜（Hanna）與沈殷怡（Shirley）聯合主演的ViuTV新劇《社內相親》。原因有二：（1）這是「登神CP」繼《大叔的愛》後再次合作；（2）劇本改編自韓國SBS電視台2022年推出的同名連續劇《社內相親》（사내 맞선）。
_
港版《社內相親》的故事，講述在高賦國際飲食集團打工的小職員孫賀利（Hollie，陳漢娜飾）假扮成閨中密友陳映書（沈殷怡飾）參加相睇，冀望能夠幫身為千金小姐的好姊妹嚇走對象，豈料對象竟然是公司CEO姜泰武（Timo，Anson Lo飾），他不但沒有被Hollie的「渣女」人設嚇怕，還決定與她結婚！
_
另邊廂，在海陽集團任職區域總經理的陳映書，因為與Timo秘書章成勳（Alfred，Edan飾）發生車禍，無意中令Timo發現他認識的「陳映書」原來由Hollie假扮，而Hollie則擔心員工身份曝光會遭「炒魷魚」，所以訛稱自己叫「孫美玲」，在連帶關係下，Hollie需要不時在兩個身份之間游走，引爆了不少笑話。雖然現時劇集未播到大結局，但有睇由安孝燮和金世正主演的韓版都會知，這場辦公室戀愛最後會有情人終成眷屬，暫時不知道港版結局會否以Happy Ending的方式處理。
_
網絡年代，所有觀眾都有渠道發表意見，而且正反皆有，再差的劇集都會吸引到一班捧場客，再好的劇集都可以有人彈到一文不值，有些人甚至會拋出一些令大家「耳目一新」的見解，所以一套正正常常、讓觀眾嘻嘻哈哈笑餐飽的愛情喜劇，無論在選角、製作，還是演技方面，評語有好與壞再也正常不過，特別是港版《社內相親》有韓版珠玉在前，少不免會有比較：劇中兩隊情侶是否夠靚仔靚女，場景是否夠Grand夠架勢，CG動畫是否夠花巧夠好睇，其實都好主觀，要拗可以講足數百年都未分勝負。
_
所以這篇文章真正想講的是，港版《社內相親》如何實現「本土化」（Localization）這回事。
_
將海外故事翻拍成本地作品，要吸引觀眾收睇，一定需要相當程度的「本土化」，如果100%搬字過紙，拍攝時跟足原著照板煮碗，觀感必然大打折扣，畢竟兩地文化、語言不盡相同，A地版本一個驚天地泣鬼神的無敵笑位，去到B地可以換來連串「黑人問號」。
_
如果兩個版本的《社內相親》都有睇的話，相信都會發現由張之彥、陳琪兩位編審領軍的港版編劇團隊，確實有將韓版改良，靠近香港觀眾口味，譬如對白方面明顯有花過心思，加插了「咁靚仔得唔得㗎」、「今次真係GG喇」等後生仔女都會講的潮流用語，整件事看起來更加「貼市」，而最過癮莫過於桂彬（VIP，麥沛東飾）的爛Gag對白，趣味十足，增加「港劇」味道，好像他口中講的揭後語「半個權志龍——GD唔GD」、「抬棺材甩褲——失禮死人」，明明老土到核爆，但放落情節之中又出奇地生鬼（當然麥東演繹本身已夠好笑！）
_
不過《社內相親》原版最出名的，始終是姜泰武那些超骨痹、勁肉麻的土味油膩情話（土味者，老土也），那句「你知道我對你的愛，和這張卡有甚麼共通之處嗎？就是都沒有限度，毫無設限！」實在睇字都毛管戙！幻想一下，如果將上述對白，用廣東話說出來，一定尷尬度爆燈，所以之後都好期待編劇團隊如何將這些對白變得「少油少糖」，以切合香港人口味。
_
日韓劇集，特別是喜劇，都偏向演得七情上面，這樣才夠Power逗人發笑，但如果將這種做法放落香港人的語境裏，就會顯得太過用力，有Overact之嫌，所以今次港版《社內相親》就改用另一種更貼地的做法——嘗試用新鮮演員配搭造成的化學作用，去補足演技上的文化差異，就好似剛才提到的麥沛東，他與飾演呂伊婷的陳俞希（Hailey）組成的「搶口CP」，比起原版更似一對歡喜冤家；至於飾演陳漢娜父母的「Ben Sir」歐陽偉豪和盧覓雪亦是新鮮，他們在戲中亦有展示到自己本身的人設，頗能畫龍點晴。
_
老實講，今時今日，做人開心要緊，睇劇不外乎想放鬆心情，總不能時時刻刻都睇《那年盛夏我們綻放如花》那種會令人情緒繃緊、諗爆腦袋的嚴肅戲劇吧？所以今次ViuTV推出《社內相親》，主打靚仔靚女，「登神」CP固然做到，兩大女主角Hanna與Shirley同樣有睇頭，加上部份激烈情節和畫面，相信大家都會睇得既醒神又興奮。