《那年盛夏我們綻放如花》觀後感：esto quod audes

 

港人講電視

20230918

《那年盛夏我們綻放如花》觀後感：esto quod audes

由題材到選角，全劇我覺得都可以用一個字貫穿—勇。而且呢份勇，唔係空有理想，盲樁樁亂咁衝嘅愚勇，而係一份做足準備，向住清晰目標前行嘅奮勇。

香港第一套生存遊戲類型劇集，血腥嘅畫面、要用腦推理嘅劇情，喺香港會唔會水土不服？可能會，你睇劇集迴響咁大，都一直冇title sponsor，就知香港市場其實好保守。要做呢個題材，無論投資定製作人，都需要好大勇氣。但難做並唔係唔做嘅理由。而製作組唔只要做，更加係要做好佢，令人知道，呢個類材喺香港，一樣可以做出成績。編劇將角色設計得有血有肉，由生存遊戲時角色之間嘅角力、對立同依賴，到完場後假裝一切正常嘅無力與壓抑，全部都流暢地表達到；一絲不苟嘅美指、搵景嘅製片，成功將編導想像嘅架空世界呈現；超強嘅攝影、燈光、配樂、歌曲，除咗令劇集感染力更強，都令觀眾得到絕佳嘅視聽享受。

校園死亡遊戲，學生角色緊係搵後生演啦！道理好易明，但現實，年輕演員既無名氣，經驗亦唔多，收視、質素都冇保證，又有幾人夠膽搏？導演願意一口氣起用大批新演員，又係一份勇氣。喺導演調教、戲劇教練嘅指導，同演員努力下，最終各位表現都稱職有餘。無為但又非無感嘅旁觀者何晞賢、勇敢而內向，總係孤獨一人嘅楊悅盈，倔強而勇於行動嘅石曉陽、自負又變態嘅高材生柯志恆、由始至終都逃避緊嘅Elaine，義氣同殘暴並存嘅Billy、為朋友去到盡嘅單純允仔，傻氣而善良嘅阿勇，反目但其實深愛大家嘅情侶Crystal、洪諾言。一眾學生角色，被George、Marf、張毓軒、張迪文、余子穎、Billy、Marco、戴玉麒、焯嵐、東東等新演員演活。大家嘅交織互動同角力，成為劇集嘅亮眼位。

縱然劇情同節奏仍有沙石，好似首集交代背景處理得頗悶；石曉陽同楊悅盈嘅背景，可以交代得好啲；最後AI輝咁易自爆，有啲落雨收柴。不過以上少少沙石，並不影響作品本身嘅光芒。神劇，未至於，但絕對係香港電視界一個大膽、破格嘅佳作。

相較小說，劇集更側重寫人。每集片頭「生涯規劃」，大家對未來都充滿期待。突然，死亡遊戲降臨，所有規劃都盪然無存，剩下嘅，只有不太經思考，率性而行嘅選擇。有人為朋友而犧牲、有人與愛人反目、有人為自己不惜殘害他人、有人不知所措，混亂完場。當中混雜自私、自負、偽善、軟弱，都同時有為朋友、為愛人、為正義而行出嚟嘅智慧同勇敢。角色們非常飽滿，或討喜，或討厭，都有明確記憶點，亦幫助推進劇情。唯有一人，似是例外。

喺成個遊戲，主角何晞賢冇做過任何影響大局嘅事，可以話係最可有可無嘅存在。直至遊戲結束嘅最後一集，佢返去盈塗鴉嘅舊地，寫上「已讀不回死全家」，佢嘅影響力，喺呢刻先真正開始。那年盛夏嘅故事，只有呢個優柔寡斷、欠缺行動力，但成功存活嘅人，可以寫落去。

人人都幻想自己會似楊悅盈咁為公義抗衡到底，又或者好似石仔咁勇於面對過錯，為他人而犧牲。但現實中，大部分人，都只會係知有問題，依然唔敢，亦諗唔到點反抗嘅何晞賢。作為何晞賢要點活下去，或者，就係劇集最終命題。

人生第一套睇到失眠嘅劇，結局固然牽動唔少情緒，但更心緒不寧嘅，係之後應該如何繼續。當記憶與論述有所不同，以後又應如何自處？或者答案，早藏於蔡銘磊紀念中學校訓當中：esto quod audes。先由身邊嘅事，去慢慢培養勇氣。面對唔合理，嘗試正視，嘗試同弱者同行，嘗試伸手拉人一把。哪怕係冇咩意思嘅陪伴，都有佢嘅作用，做到嘅，敢做嘅，盡力做，用心做，做咗先。

就算無法宣之於口，但在某些地方，心跳總會不自覺地跳得飛快。縱然不安與無力依舊，但最少記憶尚在，此刻仍能聽到心跳脈搏。不敢遺忘，也無法遺忘，那年盛夏，我們綻放如花。

#那年盛夏我們綻放如花 #歐鎮灝 #p1x3l #邱彥筒 #collar #張毓軒 #張迪文 #余子穎 #Billy #葉振弘 #戴玉麒 #焯嵐 #郭東彩 #陳健朗 #何晞賢 MakerVille ViuTV