怎麼搞的
近年怎麼愈來愈多「最後一次」出現
先有「陳漢記」
「白灼牛肉」「豬潤腸粉」「煲仔飯」不見了
跟住「李錦基」
今早收到「上海美華菜館」做埋今日就結業的消息
三扒兩撥換件衫
朋友都冇約就單拖衝落去
雖然已過了早餐時間
老闆娘仍然替我弄了一碗鹹豆漿
眼前這碗吃了超過五十年的鹹豆漿
曾經以為她會是永遠
可以陪伴我終老
怎知
這碗…便是最後一碗
細心地吃著每一口
加幾滴辣油
努力將味道記下
希望不只記在RAM中
而是永存ROM中
可堪回味
叔叔不停手在造粢飯外賣
提供給來道別的老友記
阿蘇也來了
分了我一粢飯
珍而重之囑咐我趁熱食
咬一大啖
糯米潤而不濕
煙靭而不硬
粒粒分明但又不會散
油炸鬼脆卜卜
炸菜肉鬆份量恰到好處
係一個完美嘅粢飯
但係…食埋呢幾啖
就要講拜拜
我一路都以香港有「美華」嘅栥飯而驕傲
所以喺外地
無論講到有幾好食
一律唔會嘥時間排隊食
橫豎香港有「美華」
但係以後就冇呢支歌仔唱
我思疑以後莫講仲有冇粢飯食
連「粢飯」個「粢」字慢慢都會冇人記得點寫
依家興飯糰
仲粢乜鬼飯
黐嘅咩你
但係我會記得
香港曾經有間「美華」
個粢飯黐線咁好食
經已好飽
但唔捨得放手
點埋最心愛嘅「韭黃鱔糊」同「油炆筍」
濃油赤醬泡製
鱔魚新鮮起肉
每條鱔肉有小姑娘尾指粗幼
鮮嫩彈牙
您有否吃過那些連鎖的所謂上海菜名店
佢老闆有能本事炒碟鱔糊出嚟
條條幼過牙簽
相信距離條鱔過身時間都起碼有成年
同「美華」相比
簡直係醜死鬼
「油炆筍」啊「油炆筍」
吃上海菜沒有妳總覺不成局
妳雖然不是主角
但總是會想妳
啊… 吃完了
天下無不散的美味
懷念「美華」的美味
也懷念「美華」仝人的海派式人情味
互相道別保重
勤勞了幾十年
輪都輪到你哋放假去吓玩
周圍食吓好嘢
拜拜「美華」
慶幸曾經有過妳
食足半世紀
#上海美華菜館
#大家唔使趕去
#老闆娘話今晚唔做生意
#自己人開Party
沒有留言:
發佈留言