我不認同透過「由主辦方DQ其入圍資格」去達成。

 

Simon Lim

20230416 

第四十一屆香港電影金像奬今晚頒獎，依家一眾台前幕後行緊紅地氈。

大家未必啱聽，但最後都係要講多次：我非常希望《給十九歲的我》攞唔到任何獎，但我不認同透過「由主辦方DQ其入圍資格」去達成。

當爾冬陞話金像奬係冇退選機制，佢唔係耍9大家的。莫講話主辦方冇得DQ，就連電影版權方想棄權自我DQ都冇的——因為金像奬機制係，任何電影喺香港上夠場次，就自動獲得參選資格，依家各奬項嘅入圍名單，係各專業評審團從上夠場次嘅戲揀出嚟，唔需要有人提名——電影版權方當然冇得「棄權」，因為佢根本冇「申請」過。

唔係今屆先係咁，一直都係咁。

呢個機制嘅好處不言自明：主辦方無法以行政手段使橫手干預賽果，電影版權方亦不可能因獻媚/受外力脅迫單方面棄權，獎項結果真真正正係各電影專業中，1,779位可投票人士嘅獨立決定。

當年《十年》得獎就係呢個機制嘅勝利。

「咁如果今次呢班人真係頒個獎俾《給十九歲的我》咁點算？」

你問。

咁咪眼白白睇住佢攞獎囉。你可以控訴評審團脫離群眾，但係冇得輸打贏要的。

反過嚟講，你都要俾機會嗰千幾個電影界人士的，你要俾機會佢哋證明自己——不論係證明自己貼地抑或離地。

你要主辦方用行政手段唔使佢哋揀，你就永遠冇法知道，電影界中一直冇發聲嘅人嘅真正諗法。

來日有不可抗力摧毀你個制度係一件事，你今日因為一時喜惡自毀長城係另一件事。

莫要因為一時喜惡搞9自己個制度。