孟蘭節潮州人傳統 分食添祝福(蘋果日報)
農厝七月十四鬼門關大開，不同的傳說為孟蘭節添上一點詭異氣氛。但盂蘭節對潮州人來說並不神秘恐怖，而且是十分重視的節日習俗之一。每年一度的大型孟蘭勝會，對於重視家庭觀念的潮州人來說，是一個跟神明、親人和往生者的聯繫。
「盂蘭節是個宣揚孝道，思念好兄弟，和大家一起共聚的活動。」老牌潮式糕餅店貴嶼仔和記隆主理人楊子儀指。在傳統潮洲家庭長大的他，回想小時侯過孟蘭節的情景﹐「盂蘭節大有大拜，細有細拜，家中只放一張枱便可。會有的糕點祭品跟盂蘭勝會一樣，只是麻雀雖小，五臟俱全，沒有一座座塔，但也會盡量放齊餅糖糕包。」潮洲人祭祀食品多樣化，有用花生糖手工做的齋五牲，還有不同的糕餅，如杬仁明糖、白皮綠豆沙餅等。通常都是經典禮餅叫五色餅，再加糕和包一起祭祀，儀式完結後會分食，有分享祝福的意思。而以糖來倒模製作的糖塔在儀式完成後，便會用來當糖用，拿來煮糖水跟信眾共享分食，沾上祝福的好意頭。
記者：張欣頤
信仰有兩個重要的功能：解釋生死與導人向善，釋除人類與生俱來面對無知與未知的不安，也教你點樣做人。
人死是如燈滅化為烏有，還是能量轉移到異次元空間繼續浮遊？無法考究，大部份宗教都告訴你生命盡頭有另一個世界，中國傳統道教稱那個世界為陰間，人類建構陰間的靈感離不開我們正身處的陽間，因此有冥通銀行，因此有地獄。所謂地獄即是地府的牢獄，當初是參照人間刑法系統設計，至漢朝佛教傳入中原，佛教之中十八層地獄的概念融入其中。
十八層地獄的層數未必是垂直高度的概念，而是針對人間種種惡行而設計的不同刑法，小至浪費糧食，到兄友不恭對父母不孝，以至貪圖私利以權謀私，都有不同方法懲治，現世奈你唔何，死後地獄正法，既大快人心，也勸勉做壞事前再三思，同時也是對現世不公的控訴。
正值盂蘭，遊一圈地獄，說鬼神不一定導人迷信，而是道破人性請你不要在人間作惡，回頭是岸。
記者：曾冠輝
長洲，最出名係乜？除了太平清醮、巨型魚蛋，還有鬼古，或稱鬼故。最驚嚇的一個是在一間香燭鋪聽到……有班後生仔在度假屋看到人頭在天花飛來飛去……無他，因為長洲是人口最稠密的離島，鬼故事特別容易流傳，尤其島上的香燭舖、紙紥舖，老闆隨時是個「鬼故王」。
這個驚嚇的鬼故來自貴哥（劉邦貴），今年六十歲，長洲新興街「大興」的老闆。大興有賣香燭、紙紮、溪錢等，是街坊趨吉避凶、求神庇佑的一站式「便利店」。「我以前做三行，又做過小販管理隊，試過一日打三份工，諗住賺多啲嘛，但阿女出世後身體一直唔好，賺得來又使咗去醫藥費，後尾聽親戚話轉行賣香燭，雖搵得冇以前咁多，但阿女身體好番晒，有啲係整定嘅。」入行三十多年的貴哥說。
昔日長洲多漁民、工人，島上有紙牌廠、牛皮廠、冰廠，草根大部份信鬼神，一年裏有許多地道節日如北帝誕、太平清醮等，都需要買香燭、祭品，生意很不錯。他舖頭同一條街就有五六間香獨舖、紙紮舖，數十年來各有各做，都能站得住腳。「呢間舖養大咗我仔女，而家阿女都嫁咗囉。」貴哥開懷地說。
人頭天花盤旋賣香燭、紙品，不外乎訂貨、入貨、開鋪、閂鋪等刻板工作。只是行行都有苦與樂，「呢行最大滿足係幫到人！有時仲可以聽啲客人講吓親身經歷嘅靈異故事，繪形繪聲，刺激過你睇鬼片呀。」貴哥瞇着眼笑說。聽過多少？已不記得了，隨口都能說出十個八個，有熟客甚至笑稱他是長洲的「鬼古王」。
多年前暑假，他就聽過一個最恐怖的。下午四時許，有四、五個廿來歲的後生仔來到舖頭，問他撞鬼要如何處理？原來他們在某度假屋看到天花有個人頭盤旋，飛來飛去。「呢次都算係最誇張一次，好匪夷所思，我都唔係幾信，心諗有冇咁誇張？不過但求心安理得，我都教佢哋去間屋附近拜祭吓，不過一年之後，其中一個又喺自己屋企見到個人頭，再返嚟揾我，咪叫佢拜多一次囉，後來就冇再來找我，應該冇事啩？」貴哥憶述。
東堤不是最猛長洲哪裏傳出最多靈異傳聞？很多人會以為是東堤小築，因為三十年前曾發生轟動一時的命案，一名失婚婦人身穿紅色唐裝、紅繡花鞋，先殺死親兒再上吊，其後又發生過多宗燒炭自殺案，貴哥對此不以為然，「東堤都勁嘅，傳聞嘅有人夜晚見到紅衫女人喺附近行，不過唔係最勁，有啲地方傳聞仲多，但外面好少人知，例如大石口公園，仲有天福亭對上一間大宅……超猛，聽講有個住客夜晚喺屋企瞓覺，醒咗發現自已連人帶床瞓喺路邊。啲人話呢啲地方多數係墳地，起屋時清理得唔好。」貴哥說。
大石口公園平日很熱鬧，但有家長向他親述，黃昏帶同兩個小朋友到公園踢波，原本兩人都是輕輕踢，但踢了不久，忽然互相大力將球踢向對方身上，家長怕小朋友受傷，加以喝止，誰料其中一小孩指着不遠處問：「點解嗰兩個小朋友可以咁踢？」家長看一看，四周空無一人，立即帶同小孩急急離開。
他住大石口附近屋苑，兒子有次在床上面向牆睡覺，睡醒翻身，看到床前站了個女人，彎身打側頭看著他笑，嚇得他大被蓋頭。後要找人做了法事，才沒再見到。
同一屋苑還有另一傳聞，話說有個住客入伙，插入鎖匙準備開門之際，屋內忽然有人大喊：「等陣！」以為舊住客未搬走，惟有等一等，但過了十多分鐘都毫無動靜，開門進去，空無一人，那住客最後決定不入住。「之後兩年都沒再見過那住戶，後來仲搬走埋。」貴哥說。
三招避免撞鬼聽了這麼多，怕鬼嗎？「聽埋咁多，我已經打咗防疫針。行得正企得正，有乜好驚！我自己就從未見過。就算呢個世界上真係有鬼，我諗佢俾得你見，都係想你施捨吓佢，想心安理得，咪燒啲嘢畀佢囉，我通常咁教人，之後多數會冇事，或者係心理作用啩。」貴哥隨手拿出各式各樣的紙祭品。
傳統用來拜祭及超度靈體的祭品約有六種，包括往生錢、溪錢、水衣、元寶、金銀……「呢樣係七言咒，又叫佛手或七經咒。燒衣畀亡靈一定要有，上面寫咗七種經文，其中往生咒係用來超度亡魂，為佢哋積福。」
執哪幾樣？沒有所謂，最重要誠心。不過預防勝於治療，貴哥認為最重要不要做招惹靈體的事。例如入住度假屋，切勿「貪得意」在屋內玩碟仙、筆仙等。更不要大言不慚，自命大膽，叫靈體現身。入門前最好敲敲門，說句「唔好意思，借宿一宵」。「聽過很多親身經歷既鬼，當事人都係做咗呢啲嘢。其實同做人道理一樣，你唔去搞人，無仇無怨，人哋自然唔會搞你。你尊重人，人哋就會尊重你。」貴哥從無數鬼故中悟出的人生道理。
採訪：Joe Chan攝影：陳卓文
你看過地產代理這樣宣傳嗎？「巨房巨廳、點死都得」、「315呎94萬、樓價超邪」。真有其事，2014年有經紀在放盤廣告中就以這種「譁眾取寵」口號宣傳長洲東堤小築，真係「唔知攞景定贈興」？能否賣出，不得而知。但東堤小築就很多人都知，出了名「邪門」，數十年內屋苑屢次發生燒炭自殺事件，被人謔稱為「燒炭樂園」、「自殺勝地」。提起東堤，很多人膽顫心驚，不過卻有班人以此為家。我家在東堤，其實又驚唔驚呢？
「唔驚！唔怕！七月十四夜晚我都照樣四圍走。」東堤小築住客郭卓堅說。今年78歲的他已退休20年，一直獨居東堤。別人眼中的邪門屋苑，對他來說卻是安度晚年的天堂，「我係1997年賣咗黃埔間屋，搬入嚟住。當年樓價好平，一間先至六十幾萬。除咗交通唔方便之外，呢度乜都好，可以日日游水，空氣清新，退休一流。」
環境好是好，卻要面對無日無之的燒炭自殺案。「多到連我自己都唔記得，最多係2000年，發生咗20單，我住既呢楝村屋都發過十幾次。有次有個男人燒炭自殺死唔去，問屋主拎水飲，業主唔肯畀，我咪拎啲佢飲囉……原來燒炭係會令人口乾㗎。」郭伯伯輕描淡寫。
東堤自殺風潮大約始於八十年代未。1989年6月22日，一名姓張女子將窗門用黑膠布完全密封，先把兒子刺死，再身穿全套紅色唐裝衫褲，於廁所內自縊身亡。自始以後，自殺事件便沒完沒了，久不久便發生一次，較近期是今年六月初，一對各自有家室的男女仰藥燒炭自殺身亡。「呢度環境好嘛，又可以BBQ，自殺都想開開心心過最後日子，或者係咁專揀呢度啩？」郭伯伯猜測。
東堤除了「梗有一間凶宅喺左近」，亦有很多靈異傳聞，最「聞名」是晚上有紅衣女鬼出沒，但郭伯伯對此一笑置之，「我住咁多年都未見過喎！如果真係有就唔會有咁多人入嚟度假啦。如果真係有鬼害人，咁被佢害死既人又會變鬼，咪可以報仇囉，真係鬼打鬼囉，哈哈……」郭伯伯說笑。
有人百無禁忌，亦有人寧可信有不可信其無。住在郭伯伯不遠一個地下單位的蔡小姐，是長洲原居民，住東堤小築亦近廿年。「呢度租金平嘛，四百呎先至二千幾蚊，我收入唔多，住唔起外面啲樓。鬼梗係可怕，但更可怕係變窮鬼。」當度假屋開門員的蔡小姐大聲笑說。
雖說做窮鬼可怕，但談起東堤自殺案，她仍然色變。「有時發生喺你隔籬左右喎，正常人都驚啦。人有三衰六旺，有時霉起上來，真係唔到你唔信。啱啱有個度假屋清潔阿嬸就辭咗職冇做，次次都係佢撞到自殺案，畀我都唔做啦。」蔡小姐說。像郭伯伯一樣，她住東堤廿年都沒碰過靈異事件，但身邊有些朋友卻在東堤「撞過」。「啲街坊都聽到慣晒，來來去去都係嗰啲……邊度驚得咁多，我又冇害佢。」蔡小姐說。
燒炭自殺案不斷，靈異傳聞眾多，東堤小築街坊可以做的不多，部份信鬼神的會在門口貼上各式各樣的驅邪符咒，安置神龕，保家宅平安。每年七月十四更是屋苑大事，大部份居民都會燒街方，祭祀亡靈。「東堤那邊比較多鶴佬人，本地人通常做七月十四，佢哋就做七月十五，中午做節，夜晚燒街衣，包括金銀、溪錢、元寶、水衣，同一般都差不多。」長洲鄉事委員會執行委員康叔說。
東堤小築檔案位於長洲東灣西邊，對出是東灣海灘。屋苑原本是寮屋區，八十年代由一小型發展商「求利企業」發展成低密度住宅，分兩期興建，一共提供250個單位，第一期於八十年初入伙，第二期於九十年初。現今樓齡約20至30年，部份以度假屋形式出租，部份居民自住。97樓市高峯期，每平方呎3,000多元，但2000年至2003年曾因自殺事件跌至每呎僅200餘元，亦乏人問津。
採訪：Joe Chan攝影：黃健峰
沒有留言:
發佈留言