20250317
兩甘草談新演員態度
吳浣儀指有新人對白逐句錄
“咁樣都唔連貫，戲又點會好呢”
二人回憶昔日拍戲日子，完全服從導演指示，加上菲林拍攝，單聲道收音，一NG牽連甚廣，故事前演員必定做足準備，熟讀對白，否則一NG，那場口就要重新拍攝，故當年守尾門的演員是最大壓力。
然而今非昔比，郭峰說甚至地位調轉，變成演員做主導。「而家啲演員，有啲好好，但有啲太後生，人生經驗唔夠，又唔係科班出嚟，一出道跟啲唔太掂對手做戲，咁就死喇！最好嘢係有啲演員教返導演㖭，有啲好巴閉㗎嘛，支旗夠大，要錄埋，我唔怕講。」
感同身受的吳浣儀亦和應，「有啲演員會話︰『塊面咁黑嘅，再嚟，啲燈打好少少。』」郭峰接力數︰「導演，睇playback！你擺好個shot，我做一次畀你睇，真係犀利！」
現在數碼年代，演員就算NG，亦不用重頭再來，形成他們甚少一氣呵成演好一場戲的鍛鍊，吳浣儀續說︰「對演員冇咁好，冇得練習，逐句嚟都得，一句NG，第二句第三句逐句錄，嘩！點可以咁樣，其實咁樣都唔連貫，戲又點會好呢。」
二人亦談到近年好劇本難求，甚至有些製作固步自封。吳浣儀謂︰「而家邊有進步，原地踏步就係退步。」郭峰認同︰「根本退步。戲劇、電影、電視也好，係一種藝術，唔係個個嘻嘻哈哈，喜怒哀落做齊就搞掂。畫畫都有分派別，但而家戲劇套套都一樣。(吳︰你大概都估到，睇第一集就估唔到最尾一集係點。) 睇完個故仔係冇味道，好多都係。可能有啲劇有個中心點喺度，但中心點就得一個囉，咁使唔使咁多集，使唔使咁耐呀！如果接到一個好劇本，對演員而言係好開心。」
吳浣儀認為遇上劇本好，也需有好的演員配搭及好導演，一切俱備才誕生一齣好作品，因此她說︰「要好多嘢，真係唔容易。」她說之前為ViuTV拍了一套劇(《老是常出現》)，整體感覺不錯，指導演拍攝有心機。該劇她與的對手曾偉明飾演夫妻，二人在劇中一場騎電單車戲份，被網民力讚兩位甘草仍有突破表演的驚喜。
郭峰希望再遇好劇本，有機會跟吳浣儀合作過戲癮。但吳浣儀說︰「你估搵我哋做，我就要做！要劇本好玩同埋有啲意思，咪玩下合作下，你快啲諗舊嘢拍下！」(郭︰咩一舊嘢？) 而家上面興食牛糞，咪一舊嘢囉！」疑暗寸為流量，直播不惜食「牛糞」的李國麟。
郭峰一臉不屑謂︰「呢啲做出嚟啫，我就唔會相信，有啲人係咁，專登講到好另類，好核突。」
日前他們亦提到某電視台步向衰落，其中原因是充斥山頭及擦鞋文化，郭鋒更講到有火︰「上面嗰層……（下一句被消音），山頭文化呀，手袋呀，(吳︰一層層落），唔係點會搞到香港嗰個電視咁樣，本來香港電視係好哋哋，喺東南亞帶頭。」吳浣儀慶幸在TVB工作的年代，是台前幕後都用心去做的黃金時期，正是邵逸夫掌權的年代。
講到守時是個人美德，亦是基本應有的態度，郭峰不禁以嘲刺語氣說︰「大部份舊一派都有『壞習慣』！」意會的吳浣儀即說︰「太準時、早過頭！」郭點頭同意。今時今日，守時反而變成「怪物」！吳浣儀說某年她回巢拍《季節》，開廠時發現即使已多番催促演員埋位，但依然無人入廠，她說當年自己遲到一分鐘也會被責罵。
沒有留言:
發佈留言