2025年3月25日星期二

疫情之後,大家報復式去旅行,結果香港零售大受打擊 千頌C

 


20250325
1:疫情之後,大家報復式去旅行,結果香港零售大受打擊,今年繼續反映喺各大企業最新業績。

-睇長和,香港零售業務有屈臣氏、百佳、豐澤,上年全年竟然要蝕7,200萬 —— 有紀錄以來首次見紅(詳細可以睇 股榮 分析)
-恒基發展旗下有千色 Citistore、APITA等百貨公司,全年虧損擴大至1.25億。
-至於Aeon,母公司永旺已發盈警,料全年蝕3.4億至3.8億。
原因大家講法都類似:港人唔喺香港使錢。到底香港人啲錢使多咗幾多喺外地?有無數據講到?有,真係有——

2:話說金管局每季都公佈信用卡消費數據,咁我整理咗過去10年,即係2015年至2024年數字,有幾個發現。

2024年,全港市民全年碌咗過近13億次卡,信用卡交易總額破萬億,去到10,122億元,兩粒數都係最少10年來新高(我相信都係歷史新高)。

10,122億係咩概念,相當長和巴拿馬運河交易金額 x 7,啟德體育園造價 x 31。

3:碌卡碌多咗咁多錢,其一原因,係信用卡普及咗,大家用卡買嘢買多咗,至於喺邊度買嘢,that's the question!

信用卡交易總額入面,係包括零售交易同現金貸款。單睇信用卡零售交易額,去年全年達到9,756億元,當中有71%係本地消費(6,976億元),剩返29%(2,781億元)就係海外簽帳(包埋內地)啦。海外簽帳呢個銀碼同比例高唔高?好高,仲係新高!

4:疫情之前,2015至2019年,海外簽帳佔信用卡零售消費,比例一向都係17%至18%水平,好stable;去到疫情就冇得講啦,得返12-13%。

不過一開關,大家就博老命去旅行,2023年海外簽帳比例已經去到23%,到2024年更加升到近三成。換句話講,依家港人每碌 $1,有接近 $0.3 係喺海外使——多過以往任何時候。

另外,去年海外簽帳2,781億元,比2019年同一粒數,足足高超過一倍。

5:睇埋零售消費增長,2024年碌卡消費總額,比2023年高一成。不過主要增長動力,都唔係喺香港,本地碌卡消費交易額,按年只係升3%左右,但海外碌卡消費就係另一個世界,按年大升咗35%。

6:外遊使錢使得多,次數亦都驚人。入境處數據,2024年外遊港人,錄破億人次,1.047億人次,唔單止按年大增45%,更加超越疫情前平均9,000幾萬人次水平。呢個數字亦係最少十年高位(因為我只統計左10年,唔排除其實係史上高位)。

7:港人去旅行,但有幾多遊客補位呢?2024年全年,訪港旅客有4,450萬人次,按年增長三成,但呢個數字連2019年水平都未去到(當年有5591萬人次)。

8:數據反映現實,簡單講,港人出走得太快,使錢使得太狠;旅客回流得太慢,追都追唔切。結果,本地零售就喺咁樣嘅消費逆差入面,負責埋單做輸家。

9:最後,我整咗好多個表,一兩個重要我放comment,其餘pay藏會出埋。

沒有留言:

發佈留言