20230617
《#閃電俠》
-唔講係咪十年定史上最佳超英片嗰啲，但對我嚟講係一套好好嘅戲。我覺得要俾閃電俠喺真人電影裡面獨擔大旗係唔易，佢就得高速技能其實相當單調，正義聯盟團隊裡作援助救人角色係一流，要佢突出到俾觀眾覺得係故事主角有啲難度。而呢套戲成功，多得每個細節建構上嘅心思
.
-肢體動作設計真係一流，一個超級英雄最緊要有個標誌性鋪屎。跑之前儲氣，黃光遊走全身，落眼罩，加藤鷹二指，起腳，開跑嘅時候隻手點郁，周邊嘅景物飛咁去定靜止咁呈現，播咩歌… 環境自身整套配合得好完美好爽好型。去到後面唔止躲避拯救，旋風腿還是交叉手指放電攻擊，令到本來唔上眼嘅能力都變得有層次有威脅。安排Zod將軍重臨，另一角度補圓啟動DCEU嘅大事件，亦替閃電俠安排合適強度數量對手
.
-女超人型到呢，每個見到佢嘅畫面都唔敢抖氣。當日唔知點解片場側拍流出啲人笑，我嗰時已覺得無揀錯人，你睇佢ig相就咁著件戲服無斗篷無CG，身型剛好戰鬥格已出晒嚟。戲裡面佢無休止憤怒，揸住碌嘢打到Zod仆街爽呀我都想俾佢係咁扑… 關於佢我只擔心一樣嘢，會唔會又同Zod打到龍珠咁麻木晒？收得好，無拖長無過度誇張，原來場仗係會輸… 試多幾多次都唔會贏，只有放棄係完結嘅方法。創傷造就更好嘅我同宿命主題，跟早排另一套超級英雄戲係一樣，但我認為閃電俠絕對贏，因為導演明白一部電影結構分佈，精準設計每個章節時間，講夠應該停就會停，唔係任性放大拉長
.
-Flashpoint救阿媽嘅故事，大概喺CW電視劇睇過，搞到時空亂七八糟預咗，竟然仲可以用另一個方式展現閃電俠起源，有諗頭。後生嘅主角，其實都幾煩成日鳩笑又低B我睇到有啲燥，不過又明係要與將之後成熟經歷創傷嘅Barry Allen做對比。Ezra Miller係個好演員，無論佢個人生活係點都無可否認呢點。一套戲佢可以演到超級英雄、幼稚學生、穩重導師、令人喊死孝順仔，高分過關。諗起佢喺套戲大部份時間一人分飾兩角，精神分裂咁濟，真係會攰到癲收兩份人工差唔多
.
-更有人氣嘅蝙蝠俠，一套戲出幾位真係滿足晒fans。有人話部戲贏嘅位只係賣情懷，我就唔多覺，最多都係講Michael Keaton。你問我就無感，對89 batman無乜印象。但影帝就係交到戲，更久經歷練的人生導師俾意見，一代英雄出山，不能避免地戰死，都很有存在意義，並唔係貪得意揾佢湊下腳。更重要係Bruce Wayne自己同樣經歷一夜失去父母傷痛，過來人與主角Barry Allen對嘴特別有意思。仲有每當89 batman戰鬥，拍攝手法都好似去返嗰個年代，飛標鋼索槍炸彈煙霧彈所有道具都特登唔做升級打更難打嘅仗，睇得好過癮
.
-最後想講有啲估唔到坊間都有唔少人話CG差，其實又覺得今次難得做得幾好。荷里活CG越做越hea問題我講咗幾年，打燈唔夾人景分離呢啲我都鬧過好多鑊。今次個感覺都係跟返之前DCEU嗰種tone，一打就入咗異世界，至少人同景係夾到，甚至有啲過勁嘅動作似係全電腦我都無乜問題。同埋戲中大部份時間係一人分飾兩角同場，無就住就住拍，特技已經做到無瑕疵
.
-最最最後，Nicholas Cage超人真係要拍手讚讚。係客串，但製作方用最大嘅誠意請佢返嚟，幫佢搞一段型嘅爆嘅大花金錢滿滿特技嘅打大怪獸。俾足面，我諗知咩事嘅影迷同雞治都過足癮
沒有留言:
發佈留言