代表香港嘅神係邊位？陳雲通常講皇天上帝同大鵬金翅鳥。前者不為堯存不為桀亡，後者根本就係印度嚟嘅來佬嘢嚟（都代表到嚟咗香港嘅印度人嘅）。
計我話，守護香港嘅神明，係呢三位，亦代表香港人三大民系：洪聖、譚公、天后娘。
大聖爺就聽得多，洪聖爺係邊位呢？洪聖爺尊號「南海廣利洪聖大王」，乃係「南海之神」，司掌南方海洋，總廟喺廣州黃埔，廟名「南海神廟」。本無名號，隋唐時以南海通商路，封南海之神為「廣利王」，搵錢是也。其後宋代再加封「洪聖」，至明嘉慶時得今日常用之「南海廣利洪聖大王」號，後來清代加封往往不提。舉凡海事、商事、生養、考試皆應。既然總部喺廣州，當然係代表「本地人」（早期港府紀錄如是稱粵人）。南丫島有洪聖爺灣，充份顯示南丫島住嘅係咩人啦。
譚公淵源於惠州一帶，咸豐年間方得朝廷冊封。相傳為惠州一道人，居惠州府東九龍山中修行，能驅蛇虎，童顏不老。傳說曾應官員入惠州府城招待，忽然舉壺對空斟茶，官員問其故，答曰「救火」，其後果然回報斟茶方向之博羅縣失火，忽然降水滅火。譚公可以代表香港嘅客家人，因為譚公信仰，正是由來港尋石嘅客家石匠帶嚟嘅。現時香港最大譚公廟喺筲箕灣，原為亞公岩之譚公廟。亞公岩呢個地方產石材，喺開埠之前就係客家石匠開石之地，亞公岩村本身亦係由佢哋嘅臨時住處發展而成。另外土瓜灣一帶本身亦有譚公廟，二戰時毀，只餘譚公道一條尚在。
另外，因為譚公善救火，所以都係守護粵劇嘅仙靈嚟哦～不過上年筲箕灣譚公廟竟然失火……
最後天后娘娘就唔講咁多啦，嚟自福建嘅魔法少女林默娘吖嘛～（福建佬潮州幫專事賣港仆街死啦屌）地鐵站天后嚟自銅鑼灣天后廟同天后廟道，唔使講啦～
香港嘅神明，其實都係地產霸權嘅受害者嚟。事緣二十年代，由於發生多宗「樓上廟」騙財案件，香港政府決定立《華人廟宇管理條例》，規定廟宇必須建於獨立無其他用途嘅建築物內。試問今時今日，香港地仲有咩地方可以畀你起到一座廟呢？地產霸權，真係禍及三界呀……
作者簡介
薰華
沒有留言:
發佈留言