六藝你識幾多樣？(作者薰華)

六藝你識幾多樣？(作者薰華)

首先，六藝係乜先？又有兩種說法，一者係《周禮》所提嘅六藝：禮、樂、射、御、書、數；又有一說係出於賈誼，以六藝指「六經」，即係《詩》、《書》、《易》、《禮》、《樂》、《春秋》¹。仔細一觀，賈生所講嘅六藝，亦離唔開《周禮》所講嘅六藝，所以我都係講《周禮》六藝啦。
六藝字面意思係點解呢？簡而言之，禮即禮儀、樂自然就係音樂啦、射指箭術、御就係駕駛術、書係文書、數就係算術。不過，如果只係咁睇，就太睇少呢六藝喇。六藝其實係任何一個投身政治嘅人物（現代而言，全體公民都必須要投身政治，以後另文再述）都要識嘅嘢，因為六藝其實並唔係咩用嚟風花雪月、自命儒術嘅嘢嚟，而係實實在在嘅治國之術。既然如此，其精神亦係百世不遷，要適應現代修改細節，亦係應該。何謂也？以下分解。
六藝其實可以分為三組：禮、樂係立國之本；射、御係衞國之術；書、數係治國之器。其中樂亦都可以用於軍事。

禮樂：立國之本

禮樂為何係立國之本？因為禮亦不止於禮儀、樂亦不止係娛樂。或者咁講，正正係因為佢係「禮儀」，所以先係立國之本。因為舉凡對內設制度、定等第、分先後；對外聘問、和戰、會盟等，都離唔開「禮儀」；當你要「行禮如儀」，亦離唔開音樂。所以，禮一方面係人與人之間嘅禮儀，同時亦係「天下儀」，即係村與村、城與城、國與國之間交往嘅「儀」，去到呢個層面，其實「禮」已經係「法度」。為國者，必須清楚「法度」，引伸而言，更係綱紀。
例如話，香港同澳門可以並稱「港澳」，但深圳同香港就唔應該並稱「深港」，因為深圳嘅行政等級只係「地區級」，而香港係「省級」，澳門可以並稱係因為澳門都係「省級」；作為「境外城邦」嘅香港同澳門，更加係有足夠資格同「中國」並稱。又例如話，中共李克強總理訪英，根本就唔應該要求同英女王見面，因為李克強只係政府首腦，可以見佢嘅只有英國首相甘民樂；佢要求見英女王，一係就係僭越習近平國家主席嘅大位，一係就要以「謁見」名義自貶國格；佢唔認呢？咁就係羞辱英國，因為佢要一國之君見佢呢個宰輔之臣

至於樂，一方面佢係藝術一門，通樂器者，善發心聲（《禮記》曰：「凡音之起，由人心生也。」），亦善諧和；同時，亦係內外禮儀場合，以致商肆開閉、行軍打仗，都不可或缺。你會問？行軍打仗都關事？當然，君不聞「聞鼓聲而進，聞金聲而退」？即使西方，進軍之際，亦要隨軍樂手助攻，最後發展成「進行曲」一門。樂既係文化、性情所在，亦係禮儀、法度指揮，自然與禮同列，為立國之本。
若談禮樂如何「現代化」，實又無可再現代化。只不過，現代無論政府、民間，均禮崩樂壞，上無綱紀、下無法度，藝人濫竽充數、歌不及義，公民賤視文化、唯利是尚。與其話咩現代化，不如諗下點樣恢復好過啦。

射御：衞國之術

射御二門，一係箭術、一係馭術，似無關係，其實係衞國之術。六藝之說出《周禮》，《周禮》雖云係漢化偽先秦之書，但其說未必無因。今日我哋都好清楚，當東周之世，戰陣上以兵車為主，戰爭模式乃係車戰，以雙方兵車，擇地衝鋒分勝負。列國戰備，亦以兵車之數（乘）衡量。
一乘輕車，馭四匹馬，載三個人：一人馭馬、一人執戈或鈹，以勾人或刺殺、一人執弓弩。射御之術精，臨戰而不驚，悍足以衞國。因此，將射術輕易解釋為箭術、或御輕易說明為駕駛術，係唔啱嘅。試問2016年，你要保家衞國，真係仲用弓箭？定係識揸下車就可以揸坦克車、直升機、戰鬥機、航空母艦就得？今時今日，射嘅係自動步槍同導彈添呀。
而且，當年可以學六藝嘅人都係「君子」，即係用西化中史形容嘅「貴族」。「君子」唔係指落場踢波打人或者同女人拉櫈嗰啲「君子」，而係真係要出入廟堂、上陣衞國嘅「君子」，操作先進武器（兵車同弓弩）當然係佢哋嘅職責。今時今日，我哋有專職嘅軍人，操作先進武器可以交畀佢哋。但作為公民，要做嘅就係隨時預備上陣。輕武器操作要識、防身術要學；即使冇機會學槍法、武術，至少平時都要打下波游下水，身體亦要保持良好體魄，臨戰之際──無論係戰外敵定除內姦──義之所在，出手不疑。唔通你以為真係「愛與和平穿透坦克」咩？

書數：治國之器

書數又如何治國？寫字、計數，人人都得啦。如果只係寫字、計數，就唔會名列六藝啦。書，固然包括寫字，但同時亦係用字，可以話係禮儀之輔。人唔止係要識寫字，更加係要用啱字。今時今日，中共領內之民，若以自己公司名義寫信，好用「我司」而不知有「敝店」，直稱「您」而不識用「　閣下」，講到「　足下」更加只識用於「請勿踐踏草地」告示上。書藝不傳之禍，唔止係咁：歐化中文、黨八股百年間逐寸深植於人心，即香港亦難脫一眾文學綜援戶之禍，更有正字粵棍借書藝上下其手。

咦？你話我離咗題？當然唔係。「保氏教國子以六書」嗰句嘢冇錯真係講緊寫字嘅「六書」，但咁係因為孔孟年代根本就未將「文學」自成一目嘛！去到魏晉時代，文學蔚然，如果你仲只係追求「識寫字」，已經係唔入流啦。
至於數，當然亦唔係只係講緊「計數」啦。數分為九數，當中包括面積、體積、三角、比例等，而九數名目，又偏偏係用「方田」、「粟米」等命名²。由此可知，數藝所講嘅數，唔止係計下數，而係管治上要用到嘅數學方法。「方田」之術以算田地廣狹、「粟米」之術以算五穀交易之價。若以現代而言，吸收西方數學充實亦無不可，但最重要嘅係善用數學同數據。例如話，得諸如肉價、菜價、糧價、水價、樓價、車費、月入等數，明知肉菜水樓車等費皆不合理，就應該致力調控，而唔係因為一時之利，任其惡化；又例如，營造之費要知所預算，不應無理增刪，亂用公帑。
你又話我離咗題？唔通你以為古人學數，就真係學完點計就算？
講到書數兩藝現代化，同禮樂稍同：今之人食米唔知價者多矣，寫字不知義者更多，與其更新，不如恢復；但係，恢復同時更加要強調一個「用」字。點用書、點用數，比起寫個靚字、造個靚數更加重要。亂用文字前已述，亂用數字更可惡。凡用數，明知其數反映社會異狀亦視而不見，必有貳心。認真面對數字，避免感情用事，客觀對待，合理應對，先係用數嘅態度。

依家係2016年，學六藝唔係叫你學泥古。禮、樂、射、御、書、數，以現代意義而言，你又識幾多呢？捫心自問：你待人是否有禮？治事是否合度？發言是否由心？文藝是否略通？臨戰是否勇武？出手是否合義？體格是否強健？用字是否謙和？寫字是否傳意？文章是否合理？計算是否精確？用數有否公道？
講到咁，如果仲係以為六藝係啲過時嘢，我諗……都冇咩好講架喇。道理講盡，我哋嚟講手講腳講粗口啦？