20260122
格陵蘭爭議咁就散場
Donald Trump今日响達沃斯（Davos）世界經濟論壇嘅演講，足足講超過個半鐘，佢唔單止要求同丹麥立即談判收購格陵蘭，仲串晒差唔多成個北約，特別係丹麥、法國總統、加拿大總理同英國，言詞可以話要幾mean就有幾mean。演講期間唯一令人比放心嘅就只有Donald Trump話唔會用武力奪取格陵蘭。但正當大家都以為格陵蘭爭拗會隨著Donald Trump嘅串嘴升級嘅時候，估唔到幾個鐘後竟然出現戲劇性嘅結果。Donald Trump話已經達成協議，仲即時撤消對8個北約盟友响2月1號生效嘅關稅。
串嘴演講
响講個deal之前，先回帶睇下Donald Trump响演講中有幾串。佢首先話丹麥根本就欠咗美國，因為美國响二戰救咗成個歐洲。佢話當年丹麥抵抗納粹德國六個鐘就頂唔住，連格陵蘭呢個咁重要嘅戰略位置都差啲無咗危及整個北半球，美國為自己同歐洲搶返黎，仲還返比丹麥，依家你地唔識感恩，「如果無我地，你地依家講緊德文同日文呀！」（"Without us, right now you'd all be speaking German and a little Japanese perhaps."）。
之後串英國能源政策，自己坐住北海油田唔開採去玩環保，玩到國民要比全世界最貴嘅電費，跟住就輪到加拿大總理Mark Carney推行風車發電，話呢啲只係「蠢人」先會買。同時，佢提醒Mark Carney，話加拿大free ride美國，無美國就唔會有加拿大，「下次講嘢之前要睇路。」（"don’t forget that, Mark, next time before you make statements）。
然後就輪到歐洲，Donald Trump形容依家歐洲好多地方已經衰到"unrecognizable"，接住矛頭就指向法國總統，先恥笑對方眼充血要戴黑超，"Macron, I watched him yesterday with those beautiful sunglasses. What the hell happened? But I watched him sort of be tough."，總之，講個幾鐘充滿火藥味，好似隨時反抬咁。
Stick之後出現嘅Carrot
但轉個頭，幾個鐘頭後，Donald Trump就宣布達成協議。佢响Truth Social話同北約秘書長Mark Rutte開完會，同意格陵蘭同整個北極地區嘅未來框架。基於呢個理解，佢決定撤回原定2月1號生效嘅關稅。之後記者問佢協議有無期限，佢話係非常長期甚至「無限」（indefinite），「已經得到想得到嘅所有嘢，特別係國家安全同國際安全」，會開始討論"Golden Dome"防衛計劃。北約發言人確認會議非常有成效，之後丹麥、格陵蘭同美國會繼續談判，確保俄羅斯同中國無論經濟或軍事上都永遠唔可以响格陵蘭立足。
協議內容
雖然暫時幾方面都無講協議嘅細節，但根據傳媒報導，美國唔會買斷格陵蘭，而係將軍事基地範圍嘅主權控制權交比美國，好似英國同塞浦路斯嘅協議咁，基地範圍算係美國領土。美國可以响度進行軍事行動、情報收集同訓練，仲可以促進當地發展，包括開採稀土。
成單嘢基本上美國得到實質利益，但同時就比返面丹麥同歐洲，因為唔算係吞併或者買斷，只係比個地方美國去保護大家咁樣。雖然成班人仲會開緊急會議，但華爾街股市已經大升，早前跌咗好多，證明市場鬆咗一口氣。
呢個事件仲牽涉更大計劃，上年响加沙停火期間，Donald Trump提出成立國際「和平委員會」（Board of Peace）取代聯合國，除咗非洲大部小國之外，歐洲、亞洲同中東嘅國家都有邀請，而今日土耳其同阿聯酋宣布加入，連普京都話會攞埋錢入會，而法國同瑞典已經講咗唔會加入，其他就食緊花生睇定啲。因為格陵蘭嘅爭議，呢個又係另一話題，睇黎Donald Trump之後又係會用棍同蘿蔔踢人入會。
邀請普京加入，普京話如果用凍結俄羅斯資產畀一億美元永久會籍，佢會考慮。特朗普話澤連斯基同普京「異常仇恨」，如果唔簽和平協議就「笨」。呢啲都顯示特朗普用同樣策略响全球玩：先威脅，後談判。
無論如何，又一次證明Donald Trump嘅"Art of the Deal"响國際舞台嘅演譯方式，就係用關稅棍嚇，然後先比蘿蔔，高開跟住低收，唔work就直接出鐵拳。老老實實，我地呢啲凡人鍾唔鍾意都無乜得揀，但可以肯定Donald Trump會繼續用呢啲方法重組美帝眼中嘅國際新秩序。
沒有留言:
發佈留言