20集嘅《IT狗》已經播完，劇中好多情節同對白，依然令觀眾回味。呢套劇唔係賣大製作、大卡士或者嘩眾取寵嘅甚麼性感露乜露物之類嘅情節，正如網民所講，唔會係「開開」富三代爭產、男女主角加一堆人戀情混戰、殺人嫁禍報復……說的就是這一個年代這一個社會，創業者、打工仔嘅貼地心態。
《IT狗》導演簡君晉係80後，好年輕，三十幾歲入行10年。創作路總是孤單，不知捱幾耐先有機會，所以編審小姐iris以「機會是留給有信念的人」作為句號，真的是為台前幕後團隊和繼續艱苦前行的人打氣。
簡導演噚日喺ig寫下一篇文章，形容自己「好似發咗一場夢」，「由第一套電影到今日，原來已經事隔10年，過往好多project總係擦身而過，多謝老友羅耀輝喺酒吧雪中送炭問一句：『要唔要試吓俾故仔Viu TV？』。」羅耀輝係《IT狗》監製之一。然後簡導開始《IT狗》創作之路。
簡導記得早排喺記者會上遇見台長魯庭暉，親口向對方道謝，但魯生反而好客氣向團隊講多謝，「仲同我講佢睇rough cut嘅時候已經幾鍾意，感謝魯生鼓勵及Viu TV提供咗一個舞台畀我哋。」簡導又好想感謝另一位監製林淑賢〈Debbie〉：「佢一直以來都好支持我哋想行嘅方向，亦都係第一個信任我哋堅持嘅人，仲記得佢話：真係唔需要夾硬放感情線落去。」
簡導話台前幕後俾盡200%努力，佢好感激飾演「阿信」嘅凌文龍 ，因為佢擔當起帶領觀眾體會《IT狗》世界嘅重任，「記得當初差啲因為撞期而無法演出，佢又擔心過自己寂寂無名，冇辦法擔當一套劇集嘅主角。其實我哋成個班底都係寂寂無名，經驗都未夠，多謝佢信任，當佢應承咗出演，佢真係會完全地付出，感染每一位演員及工作人員。」
劇集播出後，觀眾睇得開心，不同層面網上互動，簡導話如果呢一個月嘅時間，《IT狗》帶畀大家少少嘅歡樂、又有少少嘅安慰，對團隊而言已經係最大嘅滿足，希望有機會下一次再做好啲，「我自己最開心嘅係，無論社交媒體同論壇嘅觀眾，以至創科、設計、藝術界別嘅觀眾，都一齊參與《IT狗》，並且成為劇情嘅一部份。各式各樣嘅插畫，故事入邊嘅platform / app實體化，出色嘅媒體人為我哋撰寫文章等等……你哋嘅參與證明咗香港人係好有創意，香港係可以有創意工業，香港係可以有創科。」
最後，簡導透露自己要投入另一個創作，希望再用作品同大家見面。
沒有留言:
發佈留言