唏噓的豬肉佬: 香港毀容　核突銅像　入侵市建公園(蘋果日報)

（左起）街坊張朝敦、徐可儀、蔡守仁及劉學成特意穿古裝為街坊講古，為餘樂里這些沒靈魂的銅像添上故事，也介紹這區歷史。

【專題籽：胚芽故事】
一個月黑風高嘅晚上，我走到西營盤第三街餘樂里公共休憩空間，竟有如踏上黃泉路般陰森，有好多「人」望住我，腦海中谷德昭走咗出來，都未講完：「幻覺嚟嘅箒……」我就見到有個男人用鉸剪一嘢隊落細路個魂精，旁邊仲有班古裝人。原來佢哋係街坊，睇唔過眼呢個市建項目有堆怪誕銅像，決定來講古解畫。

醜化香港來講，市建局可謂屢建奇功，例不虛發。利東街變了所謂「購物步行街」，商店扮歐陸建築鬼五馬六，似足三色台佈景板。當中一堆西人面孔銅像更加令人頴到頭皮爛完再埋口都諗唔明，睇唔透，造工靚？唔係；有意思？無乜。有啲銅像佔領椅子，但側邊又不夠位畀人坐，想點？可是當你看到強國遊客飛撲過去四萬咁口合照，那刻我黯然離開了。以為仿真銅像呢種顯得有啲過時嘅公園點綴物已被時代巨輪捲走，原來它強勢地捲土重來，散佈在市建公園篤眼篤鼻。被捲走的其實是美感，是抽像雕塑給我們的思考空間。

複製以往氛圍？儍的嗎？

會去餘樂里公共休憩空間的不會是遊客，放銅像又是甚麼意思？哦，原來要「複製以往的氛圍」。這裏重建前有一排排戰前唐樓，被推倒後拔地而起的是住宅「星鑽」，例牌開放一個所謂的公共空間，也例牌的只做門面工夫。幾位街坊一同發起「餘樂里一號」計劃，早前更在公園大講故事，為這些本來沒靈魂的銅像賦予虛擬身份。在附近開花店的徐可儀坐在雀籠大叔側，訴說這位「陸生」的往事。「六十年代呢度有好多賭檔，有位陸生當時擔任『天文台』睇水。後來有人通風報信，搵警察拉人，陸生盡責地叫走鬼，所有人走甩，佢由一座大廈跳到另一大廈，跌咗落來，送去醫院途中證實不治。我們把銅像套入這新聞，變成銅像背景。」可儀仲創作咗一段淒美愛情故事過陸生。「佢鍾意我，但我係女子中學教師，大家背景懸殊。我哋有進一步發展前就發生咗呢件事，我負責他身後事。」可儀寧願公園設展板交代銅像緣由，寫點這裏的歷史。
藝術家劉學成提及多年前在內地「步行街」看到很多類似的雕塑。「慢慢地香港越來越多，有可能係搵大陸工廠承包製作，會唔會係要迎合某啲人嘅品味呢？呢個要反思。雕塑好似好驚觀眾唔明，所以好具象咁表現，畫公仔畫出腸，藝術最好玩其實係思考空間。」

整鐵架扮唐樓！係乜玩法？

街坊、大學學者張朝敦喜歡研究石牆，對於呢個所謂保育項目異常氣憤。「之前呢度有唐樓，市建局就整個鐵架扮唐樓，企圖『整番個氛圍』，但個架好重，佢哋竟然將地台內原本嘅碎石挖晒出來，再倒混凝土鞏固，為假古蹟破壞呢個一八六零年嘅真古蹟地台。完全無了解呢個地方嘅建築手藝同歷史。」品味崩壞或者有救，不過無視歷史，只顧做表面工夫，其實病入膏肓，無得醫。明剪髮實插頭銅像與明保育實破壞古蹟之間，後者其實更壞。

這個洗緊衫的女孩像造工麻麻，而且揪着裙的動作略帶不雅。	他們為玩雀大叔創作了一個角色「陸生」，當中有當年的新聞作背景。	到底有誰會用擔挑挑鹹魚呢？重到咁？前四後三共七條係乜玩法？
利東街的釣魚男孩在釣一棵植物。突起的樹幹出現在下體位置，想點？	強國遊客爭着與銅像合照，不亦樂乎。	餘樂里重建前有一排排戰前唐樓（右）。這個架據悉是模仿唐樓外表，但由於太重，市建局竟破壞百年古地台，做法反智。