打橫嚟講：香港地無人才？(彭志銘)

打橫嚟講：香港地無人才？

非也！  近日，有位OL小姐在冠譽世界的酒店買了幾盒月餅，送禮自用。佢食咗一個奶黃月餅而肚瀉了數次，翌日，發現同一盒內下層的一個「獨立包裝」嘅月餅，竟成隻發霉到全個綠色，好恐怖惡心！  

OL小姐以為這獨立個體包裝漏氣啫！但Check過，卻完全密封，標籤上的到期日又未過，於是致電「投訴」，店方叫佢攞番落去舖頭度換，仲話「食剩幾多換番幾多」，吓！唔通人家咬咗一啖，你賠畀人哋時，啖崩番一口呀？好奇怪的回應表明無從消費者的角度去諗，人家投訴得，已不滿o架啦！還低能到「火上加油」？咁都未算呀！OL小姐示意會向食環署投訴，店方職員就叫佢等一等，但等咗一分鐘後卻Cut咗佢線，令OL小姐o架過火屎，親自走落去「討回公道」。餅店小職員話請辦公室「高級職員」到場解答，又等了十多分鐘，營業部副經理睇過該盒月餅後的回應係：「如果你要換月餅，我可以換畀你，但成盒得一個發霉，我哋要攞去研究吓！呢啲係生產部門負責嘅，我暫時唔解釋……」國際知名嘅大酒店咁嘅服務水準，難怪OL小姐Call食環署人員到場「開Case」。當記者聞風前去「採訪」，又被銷售部經理出手「遮鏡頭」，真係證實「香港管理大陸化」了！

咁簡單嘅小事，喺街邊大牌檔啲伙記，兩嘢就拆掂化解啦！即使恐龍咁大隻老鼠喺碟生炒排骨上邊，伙記也可立刻從容搞掂。先講聲Sorry，再送兩揸生啤，加煲例湯讓客人下火，順手擸走碟「問題」證物，回頭笑口噬噬打個九折埋單，食得開心，下次再嚟幫襯！  

話香港無人才？非也！只是太多低能兒在高位而已！政府部門如是觀！ 

彭志銘  次文化考古學家，對城中潮語有深入研究，博徵博引，廢官廢人行埋一邊。