《緣路山旮旯》影評
「香港愛的距離」
（含劇透）
—
套戲嘅重中之重嘅重點，
係呢兩個字 ——「距離」。
—
荔枝窩、沙頭角、大澳、澄碧邨、下白泥、茶果嶺，作為地道嘅香港人，以上嘅地方大家即使聽過，都未必去過。五個女仔，一個男仔，展開五段男女關係，共同點係全部都發生喺無雷公咁遠嘅地方。
—
1.生命步伐之距離
—
點解有時候明明相愛，但被迫要離開？電影講嘅「距離」，又點止路程嘅距離咁簡單。而「生命步伐」嘅距離，就係兩個人可唔可以喺埋一齊嘅關鍵。演男主角阿厚嘅岑珈其第一個遇到嘅女仔係由蘇麗珊飾演嘅A.LEE。電影入面，阿厚搵到黃金機會送對方返屋企，明明可以互吐心聲，但偏偏欲言又止，最後無疾而終，後來得知原來A.LEE確診第二期癌症，姻緣戛然而止。原來，愛情係要講TIMING，真係鍾意對方，就無理由要對方喺一開始就照顧病重嘅自己，所以最後有緣無份。
—
2.價值觀之距離
—
外貌易枯，但靈魂不老，兩個人究竟可唔可以發展落去，睇嘅係「價值觀」嘅距離。阿厚第二個遇到嘅女仔，係二十九歲，由張紋嘉演嘅花花，係個擁有「恨嫁的心」嘅幼稚園老師。佢嘅目標係要三十歲結婚生仔，同阿厚形成咗一個強烈嘅對比，前者目標明確，知道自己想要一個點樣嘅「家」，亦唔會理會其他人對自己嘅睇法；後者就非常迷惘，唔知未來嘅路點行，喺人生大海載浮載沉。試問兩個人如果喺想法上咁大差異，又點可能可以繼續行落去？
—
3.志趣之距離
—
除咗價值觀，令好多情侶愈行愈遠嘅，係「志趣」嘅距離，如果兩個人日日都係你眼望我眼，無可以一齊做嘅嘢，實散。阿厚第三個遇到嘅女仔係藝術家LISA，偶然嘅機會之下阿厚喺工作上重遇對方，仲有機會共渡春宵。陳漢娜演嘅LISA，喺電影入面嘅出場同離場，都會自帶BACKGROUND MUSIC、女神風同慢鏡頭，有修養、有諗法、有才華、唔怕捱苦，LISA喺電影入面仿佛就係完美嘅化身，但偏偏阿厚同佢嘅相處就最怕醜，甚至喺講說話嘅時候，永遠都唔夠膽正眼去望對方。另一半有時唔係愈完美就愈好，如果大家嘅相處永遠都有一層隔膜，始終唔會有幸福。
—
4.等級之距離
—
有句說話叫「一個願打，一個願捱」，但如果戀人之間長期有「等級」嘅距離，每次都要盲目遷就同逢迎對方，就唔係一段健康嘅關係。再下一個女仔，係梁雍婷演嘅保險經紀MENA。兩個人因為泊車嘅緣份火辣撻著。但喺關係入面，女方一直食住男方，明顯MENA佔據住主導嘅位置，而阿厚亦只能夠唯命是從。兩個人一旦有高下等級之分，相處起上嚟往往會小事化大，阿厚曾經見到MENA同造星MANSON喺餐廳親密咁食飯，而MENA亦見到阿厚同大學女同學撐枱腳，事實上你有唔啱，我亦有唔著，見客傾嘢並無不可，最緊要嘅係溝通。兩個人喺埋一齊，一定要互相尊重，做啱要錫，做錯要鬧，唔應該有永遠嘅下靶位。
—
5.當「距離」變成「佢嚟」
—
只要有愛，「距離」就會變成「佢嚟」。人與人之間，無可避免會有距離。但只要愛對方，人係會願意犧牲。最後一個女仔，就係由余香凝飾演嘅MELANIE。佢同阿厚係大學舊同學，都係讀COMPUTER SCIENCE。兩個人一高一矮，性格亦一凹 一凸，但偏偏有數之不盡嘅話題，相處嘅時候可以除低虛假嘅面具。兩個人嘅相處舒服，喺對方有病嘅時候會照顧，喺對方失控嘅時候會安撫，喺對方有需要嘅時候會挺身而出，佢哋懂得互相欣賞，欣賞對方嘅老土，願意打開心窗，願意做主動嘅一個。兩個人喺埋一齊，最重要係自然，吓吓DEAD AIR，或者每分每秒步步為營，都唔理想。電影結尾，阿厚決定搬入長洲，近啲住喺澄碧邨嘅MELANIE，作為對成套電影命題嘅一個終極解答。人與人嘅距離，因為愛嘅付出同努力而收窄，幾山旮旯都好，都總會有容納到對方嘅位置。
—
6.香港愛的距離
—
電影兩次提到移民，將「距離」嘅命題繼續延伸，亦係劇本上嘅畫龍點睛。最後阿厚提到，其實去邊都唔重要，最重要嘅係身邊嘅係咩人。真真正正嘅關係，並唔會因為所謂嘅距離而變質：即使仲住喺香港，我哋都可以同呢個地方毫無關係，只係識得盡快搵錢鬆人；而離開咗孕育我哋嘅地方，都可以時時牽掛，常常思念。由男女關係，講到血脈相連嘅香港人嘅關係，尤其係科技發達嘅今日，山唔山旮旯，距離遠唔遠，真係咁緊要咩？最緊要嘅，係你個心。
—
（本身只係諗住寫六篇文講吓套戲嘅六個主角，但睇完套戲第二次之後，就決定寫呢一篇作為埋尾，所以立即問阿力可唔可以將之前六幅畫夾埋做一幅。套戲仲有一星期公映，盡人事幫幫呢套香港電影，真係好唔想又再一次見到第一週票房慘烈，而第二週又喊苦喊忽嘅情況了......）
.
.
.
文： 港唔斷戲
畫： 塵阿力映畫
.
.
多謝導演黃浩然邀請！畫得好開心嘅六個主角！電影較早前已欣賞過！好睇！清新有趣！亦多謝好拍檔 港唔斷戲 嘅精彩文字！星期四上！大賣！
.
沒有留言:
發佈留言