食得怪先好嗌

 

港人講電視

20221008
初頭只係抱住睇人仆街最開心嘅心態去睇，希望補返我想喺地獄廚神睇，但又冇得睇嘅嘢。估唔到最後除咗學到飲食知識，甚至會對食物有所反思。所謂暗黑料理，其實都同當地歷史、宗教、地理條件有關。節目影住Brian同一姐試食個辛苦樣嘅同時，冇一味重複好難食好難食好難食，而係會詳細解釋返道餸嘅由來同煮法，背後有咩文化背景。有啲食材睇落好怪（如蝸牛、兔、駱駝、蜥蜴），但其實係同當地嘅地理限制，生活水平有關。節目內容好充足，令人學到唔少飲食文化知識。

至於娛樂性，有brian同一姐互相chit chat，感覺節奏好過之前兩個旅遊節目。除咗睇佢哋嘅無奈試食樣，中間幫一姐揾荀盤、brian同Rizzy嘅「超友誼」、去市集講價、brian啲亂入爛gag都令個節目變得輕鬆搞笑。

資訊、娛樂性有齊，但講到最深刻，不得不提摩洛哥宰牲節。除咗血淋淋嘅屠宰畫面令人難忘，更令人深思食物嘅來源。無論係植物定動物，本來都係一條生命，要補充我哋嘅營養，就必須犧牲佢哋。節目講明係挑戰怪異菜式，當中不乏一啲好少人會食嘅部位（如頭、眼、睪丸）。雖然聽同睇落有啲核突，但某程度上呢啲菜式只係善用食材嘅每一部分，令動物嘅犧牲更有意義，係對生命嘅一份尊重。

因為環保、宗教、倫理唔同理由，好多人討論應唔應該食肉。無論你最後得出咩結論，做出咩選擇，最起碼，係唔好浪費食物。食得怪，嗌唔嗌係個人選擇，但食得哂先好嗌，人人都應該咁做。

睇完個節目，有啲覺得怪嘅其實唔係食物，而係我哋嘅諗法太狹窄。如最後主持所講，保持open mind，勇於嘗試發掘，世界會比想像中更闊更有趣。