講兩句《善男信女》港唔斷戲

 

港唔斷戲

30

分鐘前

20261031

講兩句《善男信女》

「黑色幽默中一點光」（不含劇透）

—

—

近呢一兩個月連續睇咗好多套香港嘅新戲，《廚師發辦》、《超風》、《我阿爹想旅行》等等等等，尋晚仲睇埋《第四幕》。令我覺得暑假過後，香港電影有「回春」嘅感覺。誠然唔係套套都係優秀，但每齣套都有佢嘅誠意同嘗試，各有優點同特色，2026下半年，影迷有福。

—

而喺悠悠眾片之中，

最好嗰套，

竟然係我一開始期望最低嘅《善男信女》。

—

原因好簡單，我對男主角楊偉倫同女主角鍾雪都無感，而對新導演楊兩全無太多認識（之前佢編嘅《過時過節》差得過份，再翻睇資料，原來我同佢係同年中大畢業，可能做學生嗰陣有見過都未定），所以入場真係純粹支持。

—

但睇完電影過後，覺得套戲拍得好好，喺商業同文藝之間拎到一個巧妙嘅平衡，人物好地道，好香港，好有共鳴。而電影亦可以做到一樣多數現今香港電影人忽略，但偏偏係最重要嘅嘢——寫好人物同劇情，好好咁講好一個「故事」。就係因為故事好，唔需要致敬，唔需要硬滑稽，唔需要過多嘅計算，配合不慍不火嘅演出，成就咗一套老少咸宜，唔刻意無腦。亦唔扮高深悶藝嘅好電影。

—

「生活得唔開心，點解唔死咗佢？」呢個問題係電影嘅命題，亦係對人生嘅一個終極嘅叩問。當死亡始終會來臨嘅時候，點解唔想死？係因為生命再苦都好，對未來仍然有期盼，仍然有嘢要去追逐，仍然有人要去愛，仍然有人要去嬲，對個世界仍然有感覺。

—

《善男信女》用黑色幽默嘅方式，為觀眾帶嚟狹縫中嘅一點光。人與人之間與其相害，不如相愛，唔好互相「將就」，而係彼此「包容體諒」。好嘅作品訊息永遠係簡單，但感情往往係無限。

—

多謝呢一套好電影，因為你，喺末落嘅市道，我對香港仍然可以出產好嘅電影，仍有期盼。