看我今天怎麼說：黃修平至今最佳作品史健仁

 

史健仁在健仁影視2025 相簿中新增了 1 張相片。

【看我今天怎麼說：黃修平至今最佳作品（82/100）】

黃修平嘅電影應該會有「平式煎釀三寶」（夢想，成長及學生），《看我今天怎麼說》都唔例外。佢嘅故事都係三人行（我最喜歡嘅其中一種劇本格局），主角都有學生片段，導演都會描述佢哋嘅成長，亦會講到佢哋踏入社會大熔爐後要面對嘅兩難及抉擇。角色之中都會存在現實及理想主義者，最後理想主義者都冇放棄到理想（註1電影裡面）。整體上，《看我今天怎麼說》依然係一部好黃修平嘅電影。

電影裡面有幾場大廈天台戲，老實講睇戲個陣有一刻擔心黃修平會一時「谷慘上腦」，描寫角色從大廈跳落去嚟迫觀眾眼淚。好在導演冇諗住拍《年少日記2.0》，而選擇將故事焦點放係三位主角係新時代社會所面對嘅糾結方面。係一啲可以煽情催谷觀眾眼淚嘅場景上，導演處理得頗為克制，冇大頭close-up亦冇用慘情配樂，就連角色眼淚都專登唔拍得清晰。導演選擇走嘅創作方向，我認為相當正確。

《看我今天怎麼說》冇放大或消費聾人嘅悲慘世界，相反選擇咗一個陽光而開朗嘅面向。電影裡面嘅聾人嘅手語溝通內容原來相當生鬼，生活亦多采多姿，而三位主角都各自有自己嘅生活。電影故事既非獵奇，亦非左翼常見嘅歧視世界惹觀眾憐憫，反而直率而坦承。加上聾人出場嘅場景多數係日頭，導演又採用自然光，令到聾人出場嘅畫面特別柔和舒適（註2）。

總而言之，電影裡面聾人嘅出場係唔會令觀眾感到悲傷，我認為導演思考拍攝手法時係刻意咁樣做。近年唔少獲香港網民推崇嘅慘戲，我睇個陣並冇喊過，反而主調開朗又平衡嘅《看我今天怎麼說》就令我落下男兒淚。坦白講，生活係香港有邊個唔辛苦唔慘？

《看我今天怎麼說》裡面嘅鍾說真正打動到我嘅，係佢跟住主流嘅社會價值觀走咗咁多年，最終都搵到一條自己係呢個社會會走得更舒適嘅路。呢個角色設定令我感受到一絲希望，如果香港導演設計角色個陣都會好似黃修平咁樣諗就好啦。

除咗觀影感覺舒服自在之外，《看我今天怎麼說》仲令我搵返好耐之前睇電影嘅感覺。電影裡面有唔少寂靜嘅場景，冇對白，甚至連配樂都冇，觀眾需要透過字幕，角色表情及肢體動作去解讀故事情節。呢種係二戰前後左右嘅黑白電影嘅表達手法，其實就係最原始嘅影像語言。導演以最原始嘅方式交待故事（連背景聲音都根據當時情節而轉變），觀眾則以最直白嘅方式去感受故事，呢個冇任何雜質嘅交流，就係影像其中一個最迷人之處。

電影最感動到我嘅兩個場景，都係寂靜嘅場景，兩個都有鍾說參與。鍾說交待到角色嘅複雜情緒轉變，細節觀察入微（特別係初段未熟手語時望向其他人嘅微細表情），而且層次仲幾豐富。鍾說嘅演出當然出色，但其實游學修都相當唔錯，佢將角色嘅市井及粗糙演繹得相當有力。

觀影感覺舒服自然，又讓觀眾感受原始影像語言嘅獨特感覺，導演交待主題手法嚴謹，而且並非單純交待角色及社會狀況，而係有放入自己嘅諗法（科技與手語可以共存，而並非互相排斥，非黑即白），另外演員演繹又相當精準。電影唯一美中不足之處，就係略嫌電影尾段嘅大廈天台場景嘅篇幅有點過多，打亂咗故事節奏，呢類刻意arty嘅手法同電影主調亦有少少格格不入。

從各方面去睇，我都認為《看我今天怎麼說》係黃修平執導至今最佳嘅作品，所以佢會係暫時今年我給予最高評分嘅本土電影。今年上映嘅本土電影將會非常少，希望之後會出現一部評分比呢部更高嘅本土電影作品。

（82/100）

___________

註1：理想主義者放棄唔到自己嘅理想，到最後都會好似電影裡面鍾說嘅結局一樣。電影裡面嘅鍾說，其實即係今日嘅黃修平。

註2：角色衝突及糾結嘅場景多數係黃昏及夜晚，呢種影像色調與角色情緒及劇情互相配合嘅手法，其實都幾學院派。