《白日之下》港唔斷戲

 

港唔斷戲

20231031

《白日之下》十一月二號正式公映，

套戲係我喺二零二三年，

暫時最愛嘅香港電影。

—

杜SIR曾經喺年頭擲地有聲咁講過：「我覺得香港.....啊no sorry，我覺得全球嘅爭取自由嘅國家同人民呢，佢哋都要支持電影，因為佢係同你發聲嘅。」

—

而改編自真實社會事件嘅《白日之下》

的而且確，做到以一個近乎赤裸嘅角度，

為人民發聲，直接揭露社會嘅不公不義，

批評香港現行嘅社福制度、法律制度，

等大眾可以重新關注社會上面，

睇唔見就當唔知嘅弱勢社群。

—

空有議題作為招徠嘅電影，

走唔到好遠嘅路，

可能會被關心社會嘅一啲圈子追捧，

但呢啲嘢未必係大眾真正需要嘅作品。

而《白日之下》嘅難得之處，

就係喺甚具意義嘅主題之下，

拍出一套紮實、震撼、有力嘅電影。

—

喺電影入面，老中青三代演員都各擅勝場，全部都有戲可演。例如新生代嘅余香凝，我唔止講過一次，就係一直以嚟都唔算特別喜歡佢，但今次佢真係做到好好，尤其係睇到佢可以演到一個「人」嘅眾多面向，例如作為記者嘅硬朗、作為孫女嘅溫柔、作為下屬嘅據理力爭、作為香港人嘅唔甘心、迷惘同堅持......如果話佢拎到下屆香港金像獎影后，我覺得值。又或者幅圖入面無嘅梁雍婷，或者周漢寧，佢哋都係演智力有障礙嘅角色，有難度，但都可以喺電影入面交出超水準嘅表現，新生代嘅演員機會少，但唔可抹殺佢哋嘅可能性，遇到好嘅作品，就會發光。至於「中代」同「老代」，姜大衛、胡楓、寶珮如、林保怡、陳湛文、龔慈恩等等等等，呢班演員喺今時今日未必係票房保證，但我諗大家都係認同佢哋係實力派演員，呢班演員喺戲入面無互相搶風頭，反而各司其職，演好每一場戲，成就咗《白日之下》。

—

下半年電影市道，乃至全港嘅消費力都好似陷入一片死寂，之前唔少成績應該可以更好嘅作品，最後都係一套接一套咁去送死，好似睇唔到希望，大家生活都艱難。堅持落去未必有成果，但唔願意再努力，就注定死路一條。誠如電影入面其中嘅一句對白：「可能我哋試過一千次都係無用，但話唔定今次就會有改變。」我哋的確改變唔到個世界，可能過兩日就會比個世界忘記，可能大家寧願北上都唔再對香港電影產生興趣，但我哋可以改變嘅，係自己。

—

誠意推薦《白日之下》，

無論有幾多次失敗，

都唔會阻礙到好作品嘅誕生

更何況，香港電影仲未到一千零一次呢？