男拔女拔佔中(左丁山)

男拔女拔佔中(左丁山)

反佔中老友傳來一篇：「你們已經是神了，還爭取什麼？」話係轉貼，原文出自李純恩，李純恩邊會得閒寫呢啲嘢呀，即刻傳去俾李純恩睇，笑佢不如將李純恩三隻字註冊專利，免被盜用。李純恩即刻回覆否認佢係作者，大駡幾句。啲親建制派反佔中派人士又真係奇，點解不時冒名出文章呀，沈祖堯又冒，李純恩又冒，加上一連串之說教文字（例如阿爸教仔講佔中，阿媽教女講佔中，警員心聲，港人吐真言等等諸如此類），文字確實寫得唔錯，亦有心思，但最弊就係冒名人名字出之，或完全不敢具名，都唔知怕乜。大概係香港左派圈子好有錢，養埋一個寫作班子，成員要交作文功課都唔定。但在今天網絡世界，不敢具名據理力爭，只係鬼鬼祟祟咁冒用李純恩之名，絕對弄巧反拙嘅啫。

昨日講世代鴻溝，例子多得很，最顯著嘅係尖沙嘴聖瑪利書院有千二名校友學生在網上聯署反駁大師姐羅范椒芬，又有大量男拔萃女拔萃校友學生在蘋果日報（十月四日）刊登全版署名廣告支持學生和平爭取民主自由，學生佔中，好多人或者唔多留意，左丁山就覺得係大件事，男拔女拔喎，香港精英中學也，歷年盛產學生尖子，社會不少名人、專業精英皆來自男拔女拔，兩間學校可在短短幾日內，收集過千名字，有老有幼，最細嘅係今年中一學生，刊登廣告支持佔中，好唔簡單，銀紙當然係次要，男女拔學生拎得出嘅，令特區政府震驚也者，就係下一代精英如此反政府，佢地大學畢業之後，多數成為社會棟樑，各個專業嘅重要人物，三十幾年後，香港係佢地嘅世界（即2047之後），中國即使到時廢除一國兩制，將香港變成中央直轄市，面對呢班自細反叛嘅精英，如何對付？唔通特區政府以後集中聘用香島、培僑、福建呢類中學嘅畢業生嚟反壓男拔女拔、聖瑪利、喇沙等？會輸蝕晒噃，不如咁嘞，快快將英皇、皇仁、庇理羅士、伊利沙伯等官立中學轉化成香島、培僑或愛國學校啦！世事幾奇，昔年港英實施甚麼「奴化教育」，卻為港大、中大提供咗大量民主回歸派嘅愛國大學生。回歸後，特區政府力推母語教學教育改革，就竟然為所有大專院校供應「反中亂港」嘅大學生！中國一窮二白、民不聊生時，香港大學生親共。中國成為世界第二大經濟體系、中國遊客征服世界之時，香港大學生竟然反共。北京嘅理論家，如何解答？